நடைபயிற்சிக்கு சென்ற தொழிலதிபர் காரில் கடத்தல்: ரூ.50 லட்சம் கேட்டு மிரட்டிய முகமூடி கும்பல்

சென்னை சேத்துப்பட்டைச் சேர்ந்த தொழிலதிபர் கமலேசன் ஆபிரகாம் (58), தினமும் கீழ்ப்பாக்கம் நேரு பூங்கா பகுதியில் நடைபயிற்சி மேற்கொள்வது வழக்கம். நேற்றுமுன்தினம் காலை வழக்கம் போல் நடைபயிற்சிக்குச் சென்றபோது, காரில் வந்த முகமூடி அணிந்த 4 பேர் கொண்ட கும்பல் அவரை வலுக்கட்டாயமாக காரில் கடத்திச் சென்றது.

ஆபிரகாமை மிரட்டிய அந்த கும்பல், ரூ.50 லட்சம் கேட்டு சித்திரவதை செய்தது. அவர் ரூ.30 லட்சம் தருவதாக ஒப்புக்கொண்ட பிறகு, மீதிப் பணத்தைக் கேட்டு மிரட்டி அனுப்பி வைத்தனர். இதுகுறித்து அவர் கீழ்ப்பாக்கம் காவல் நிலையத்தில் புகார் அளித்தார்.

போலீஸார் ஆபிரகாம் மூலம் பணம் தருவதாகக் கூறி கடத்தல்காரர்களை வரவழைத்தனர். சென்ட்ரல் ரயில் நிலையம் அருகே பணம் வாங்க வந்த புளியந்தோப்பைச் சேர்ந்த ராம்குமார் (23), திருவொற்றியூரைச் சேர்ந்த ஜெயகுமார் (26), ஜெய்சரவணன் (20) மற்றும் புதுச்சேரியைச் சேர்ந்த பொன்னி வளவன் (25) ஆகிய 4 பேரையும் தனிப்படை போலீஸார் மடக்கிப் பிடித்து கைது செய்தனர்.

செய்தி மூலம்: இந்து தமிழ் திசை