கட்டுமான நிறுவனத்திற்கு ரூ.5.33 லட்சம் அபராதம்: நுகர்வோர் நீதிமன்றம் உத்தரவு

கோவை வெள்ளலூர் மகாலிங்கபுரத்தைச் சேர்ந்த பர்வீன் நிஷா என்பவர், மலுமிச்சம்பட்டியில் உள்ள ஒரு கட்டுமான நிறுவனம் மீது நுகர்வோர் நீதிமன்றத்தில் மனு தாக்கல் செய்திருந்தார். அதில், ஒப்பந்தப்படி வீட்டை கட்டி முடிக்காததாலும், கூடுதலாக பணம் வசூலித்ததாலும் தமக்கு மன உளைச்சல் ஏற்பட்டதாகக் குறிப்பிட்டிருந்தார்.

மனுவை விசாரித்த நீதிமன்றம், கட்டுமான நிறுவனம் பெண்ணுக்கு ரூ.5.18 லட்சம் திரும்ப வழங்கவும், மன உளைச்சலுக்கு இழப்பீடாக ரூ.10,000 மற்றும் நீதிமன்ற செலவாக ரூ.5,000 என மொத்தம் ரூ.5.33 லட்சம் வழங்க உத்தரவிட்டது.

செய்தி மூலம்: இந்து தமிழ் திசை