கோவை வெள்ளலூரில் அகழாய்வில் கிடைத்த பழமையான பொருட்களை ஆர்வத்துடன் பார்வையிட்ட பொதுமக்கள்

கோவை வெள்ளலூரில் தொல்லியல் துறை சார்பில் நடைபெற்று வரும் அகழாய்வில் கண்டெடுக்கப்பட்ட பழமையான பொருட்களைப் பொதுமக்கள் நேற்று ஆர்வத்துடன் பார்வையிட்டனர். மத்திய அரசின் அனுமதியுடன் கடந்த ஏப்ரல் மாதம் முதல் இப்பகுதியில் அகழாய்வு பணிகள் மேற்கொள்ளப்பட்டு வருகின்றன.

இந்த ஆய்வில் மண் பானைகள், இரும்பு கருவிகள், ஆபரணங்கள் மற்றும் சுடுமண் விளையாட்டு பொருட்கள் என 500-க்கும் மேற்பட்ட பொருட்கள் கிடைத்துள்ளன. இவை சுமார் 2,000 ஆண்டுகளுக்கு முந்தையவை என ஆய்வில் தெரியவந்துள்ளது. மேலும், ரோமானியர்களுடன் வணிகத் தொடர்பில் இருந்ததற்கான சான்றாக 3 நாணயங்களும் கண்டெடுக்கப்பட்டுள்ளன.

பொதுமக்கள் பார்வையிடுவதற்காக நேற்று ஒரு நாள் மட்டும் அனுமதி வழங்கப்பட்டிருந்தது. சுமார் 45 ஏக்கர் பரப்பளவில் அமைந்துள்ள இந்த அகழாய்வு தளத்தில் 7 குழிகள் தோண்டப்பட்டு பணிகள் நடைபெற்று வருகின்றன. தொடர்ந்து ஆய்வுப் பணிகள் நடைபெறும் என தொல்லியல் துறை அதிகாரிகள் தெரிவித்தனர்.

செய்தி மூலம்: இந்து தமிழ் திசை