மேட்டுப்பாளையம்-கோவை மெமு ரயில்: கூடுதல் பெட்டிகள் இணைப்பு

மேட்டுப்பாளையம்-கோவை இடையே இயக்கப்படும் மெமு ரயில் சேவையில், பயணிகளின் வசதிக்காக கூடுதல் பெட்டிகள் இணைக்கப்பட்டுள்ளன. இதுவரை 8 பெட்டிகளுடன் இயங்கி வந்த இந்த ரயில், ஆகஸ்ட் 9 முதல் 12 பெட்டிகளுடன் இயக்கப்படும் என சேலம் ரயில்வே கோட்டம் அறிவித்துள்ளது. தினசரி ஆயிரக்கணக்கான மாணவர்கள் மற்றும் கோவை அரசு மருத்துவமனைக்குச் செல்லும் நோயாளிகள் இந்த ரயிலைப் பயன்படுத்தி வருகின்றனர்.

முன்பு 8 பெட்டிகள் கொண்ட இந்த ரயிலில் சுமார் 1,600 பயணிகள் மட்டுமே பயணிக்க முடியும் என்ற நிலையில், தினசரி 3,800-க்கும் மேற்பட்டோர் பயணம் செய்து வந்தனர். இதனால் கடும் நெரிசல் ஏற்பட்டு, பயணிகள் ரயிலின் கதவுகளில் ஆபத்தான முறையில் தொங்கிக்கொண்டு பயணம் செய்யும் சூழல் இருந்தது. பொதுமக்களின் நீண்ட நாள் கோரிக்கையை ஏற்று, பயணிகளின் பாதுகாப்பு மற்றும் வசதியைக் கருத்தில் கொண்டு இந்த நடவடிக்கை எடுக்கப்பட்டுள்ளதாக ரயில்வே நிர்வாகம் தெரிவித்துள்ளது.