அரசு நெல் கொள்முதல் நிலையத்தில் லஞ்சம் கேட்பதாக புகார்: அமைச்சர் ஆய்வில் உறுதியானதால் ஊழியர் பணியிடை நீக்கம்

கடலூர் மாவட்டம், வடலூர் அடுத்த மருவாய் கிராமத்தில் உள்ள அரசு நேரடி நெல் கொள்முதல் நிலையத்தில் உணவுப்பொருள் வழங்கல்துறை அமைச்சர் வெங்கடரமணன் நேரில் ஆய்வு செய்தார். அப்போது, அங்குள்ள கொள்முதல் பதிவேடுகளை சரிபார்த்த அவர், விவசாயிகளிடம் நேரடியாகக் குறைகளைக் கேட்டறிந்தார்.

இந்த ஆய்வின்போது, ஒரு விவசாயி நெல் மூட்டைக்கு ரூ.50 முதல் லஞ்சம் கேட்பதாகப் புகார் தெரிவித்தார். மேலும், குறிஞ்சிப்பாடி அடுத்த வழுதலாம்பட்டு இலங்கைத் தமிழர் பகுதியில் உள்ள நியாயவிலைக் கடையில் பொருட்களை முறையாக வழங்கவில்லை என்றும், அரிசி மற்றும் பருப்பு வகைகளில் புழு, பூச்சிகள் இருப்பதாகவும் புகார்கள் எழுந்தன.

புகாரின் உண்மைத்தன்மையை உணர்ந்த அமைச்சர், சம்பந்தப்பட்ட பட்டியல் எழுத்தர் வேல்முருகனை பணியிடை நீக்கம் செய்ய மாவட்ட ஆட்சியருக்கு உத்தரவிட்டார். முறைகேடுகளில் ஈடுபடும் அதிகாரிகள் மீது கடுமையான நடவடிக்கை எடுக்கப்படும் என்றும், விவசாயிகளிடம் லஞ்சம் கோரும் யாராக இருந்தாலும் புகார் அளிக்கலாம் என்றும் அமைச்சர் எச்சரித்தார். மேலும், கொள்முதல் நிலையம் முறையாகச் செயல்படும் வரை அதனைத் தற்காலிகமாக மூட உத்தரவிட்டார்.

செய்தி மூலம்: இந்து தமிழ் திசை