மீனவர்களின் வாழ்வாதாரத்தைப் பாதிக்கும் மாமல்லன் நீர்த்தேக்கத் திட்டத்தை அரசு கைவிட வேண்டும்

கிழக்கு கடற்கரை சாலை, நெம்மேலியில் தமிழக அரசின் நீர்வளத் துறை சார்பில் ரூ.342 கோடி செலவில் மாமல்லன் நீர்த்தேக்கம் அமைக்கப்பட்டு வருகிறது. இத்திட்டத்தால் மீனவர்களின் வாழ்வாதாரம் பாதிக்கப்படும் என்று மீனவர்களும், சூழலியலாளர்களும் எதிர்ப்பு தெரிவித்துள்ளனர்.

கோவளம் பகுதி மீனவர் நாராயணன் கூறுகையில், 'ஐஐடி மற்றும் நீர்வளத் துறையின் சாத்தியக்கூறு அறிக்கைகள் மீனவர்களின் பாதிப்புகளை முழுமையாக மதிப்பீடு செய்யவில்லை. இந்த நீர்த்தேக்கத்தால் மழைகாலத்தில் மழைநீர் கடலுக்குச் செல்வது தடுக்கப்பட்டு, வெள்ளநீர் ஊருக்குள் புகும் அபாயம் உள்ளது. பல தலைமுறைகளாக கடலோரத் தொழிலில் ஈடுபட்டுள்ள எங்களுக்கு, இந்தத் திட்டம் பேரிழப்பை ஏற்படுத்தும்' என்றார்.

சூழலியலாளர்கள் கூறுகையில், 'அந்தப் பகுதியில் 123 வகையான பறவையினங்களும், வெளிநாடுகளில் இருந்து வலசை வரும் 40 வகையான பறவைகளும் வசிக்கின்றன. இந்தப் பல்லுயிர் சூழலை அழிக்கும் இத்திட்டத்தை அரசு உடனடியாகக் கைவிட வேண்டும்' என்று வலியுறுத்தியுள்ளனர்.

செய்தி மூலம்: இந்து தமிழ் திசை