பர்கூர் அருகே 2,500 ஆண்டுகள் பழமையான ஈமப்பேழை கண்டெடுப்பு

கிருஷ்ணகிரி மாவட்டம் பர்கூர் அருகே கந்திகுப்பம் கிராமத்தில் கோயில் கட்டுமானப் பணிக்காக குழி தோண்டியபோது, சுமார் 2,500 ஆண்டுகள் பழமையான ஈமப்பேழை மற்றும் தொல்பொருட்கள் கண்டெடுக்கப்பட்டன. இது குறித்து தகவலறிந்த வருவாய்த் துறையினர் மற்றும் தொல்லியல் ஆய்வாளர்கள் சம்பவ இடத்திற்கு வந்து அவற்றை மீட்டனர்.

கண்டெடுக்கப்பட்ட பொருட்கள் அரசு அருங்காட்சியகத்தில் ஒப்படைக்கப்பட்டன. இவை கருப்பு-சிவப்பு நிற பானை ஓடுகள், மண் குவளைகள் மற்றும் 50-க்கும் மேற்பட்ட எலும்புத் துண்டுகளை உள்ளடக்கியுள்ளன. ஒரு இரும்புத் துண்டும் கண்டெடுக்கப்பட்டுள்ள நிலையில், இது ஒரு குழுத் தலைவருக்காக அமைக்கப்பட்ட ஈமப்பேழையாக இருக்கலாம் என்று அருங்காட்சியக காப்பாட்சியர் சிவக்குமார் தெரிவித்துள்ளார்.

செய்தி மூலம்: இந்து தமிழ் திசை