மாநகராட்சி பள்ளி கேஜி ஆசிரியர்களுக்கு நடப்பு மாதம் ஊதியம் இதுவரை வழங்கவில்லை

மதுரை மாநகராட்சி பள்ளிகளில் பணிபுரியும் எல்கேஜி மற்றும் யூகேஜி ஆசிரியர்களுக்கு இந்த மாத ஊதியம் இதுவரை வழங்கப்படாததால் அவர்கள் சிரமத்திற்குள்ளாகியுள்ளனர்.

மாநகராட்சி கீழ் இயங்கும் பள்ளிகளில் 81 கேஜி ஆசிரியர்கள் மற்றும் 70 உதவியாளர்கள் பணியாற்றி வருகின்றனர். இவர்களுக்கு மாதந்தோறும் 5-ம் தேதிக்குள் ஊதியம் வழங்கப்படுவது வழக்கம். ஆனால், 21-ம் தேதி ஆகியும் ஊதியம் வழங்கப்படவில்லை.

இது குறித்து மாநகராட்சி அதிகாரி ஒருவர் கூறுகையில், 'ஊதிய அனுமதி கோப்புகள் மாமன்றத்தில் ஒப்புதல் பெற்று துணை மேயரின் கையொப்பத்திற்காகக் காத்திருக்கிறது. அவர் கையொப்பமிட்டவுடன் ஓரிரு நாளில் ஊதியம் வழங்கப்படும்' என்று தெரிவித்துள்ளார்.

செய்தி மூலம்: இந்து தமிழ் திசை