பேரையூர் அருகே மொட்டமலையில் இரும்பு உருக்காலை எச்சங்கள், வெண்சாந்து பாறை ஓவியங்கள் கண்டுபிடிப்பு

மதுரை பேரையூர் அருகே உள்ள மொட்டமலையில் தொல்லியல் ஆய்வாளர்கள் மேற்கொண்ட கள ஆய்வில், சங்க காலத்தைச் சேர்ந்த இரும்பு உருக்காலை எச்சங்கள் மற்றும் வெண்சாந்து, செஞ்சாந்து பாறை ஓவியங்கள் கண்டறியப்பட்டுள்ளன.

இந்த மலைப்பகுதி முற்காலத்தில் சேர மற்றும் பாண்டிய நாட்டு வணிகப் பாதையாக இருந்துள்ளது. சுமார் 20 அடி நீளம் மற்றும் 7 அடி அகலம் கொண்ட குகையில், ஆதி மனிதர்கள் வாழ்ந்ததற்கான தடயங்கள் மற்றும் 3,000 ஆண்டுகள் பழமையான ஓவியங்கள் அழிந்த நிலையில் காணப்படுகின்றன.

இரும்பு உருக்கு கழிவுகள் மற்றும் குழாய் துண்டுகள் இப்பகுதியில் அதிகளவில் கண்டெடுக்கப்பட்டுள்ளன. உதவிப் பேராசிரியர் து.முனீஸ்வரன் தலைமையிலான ஆய்வுக்குழுவினர் இப்பகுதியின் தொல்லியல் முக்கியத்துவத்தை உறுதிப்படுத்தியுள்ளனர்.

செய்தி மூலம்: இந்து தமிழ் திசை