வாடிப்பட்டி அருகே ஆம்னி பேருந்து விபத்து: 30 பயணிகள் அதிர்ஷ்டவசமாக உயிர் தப்பினர்
வாடிப்பட்டி அருகே ஆம்னி பேருந்து விபத்துக்குள்ளாகி தடுப்புகளைத் தாண்டி எதிர் திசையில் நின்றதில் 30 பயணிகள் காயங்களுடன் உயிர் தப்பினர்.
வாடிப்பட்டி அருகே பெங்களூருவில் இருந்து மதுரை நோக்கி வந்த ஆம்னி பேருந்து, முன்னால் சென்ற லாரியின் மீது மோதியதில் சாலையின் நடுவே இருந்த தடுப்புகளைத் தாண்டி எதிர் திசைக்குச் சென்றது. இச்சம்பவத்தில் பேருந்தில் இருந்த 30 பயணிகளும் அதிர்ஷ்டவசமாக காயங்களுடன் உயிர் தப்பினர்.
பேருந்து எதிர் திசை சாலையில் புகுந்தபோது, அந்தப் பாதையில் மற்ற வாகனங்கள் வராததால் பெரும் விபத்து தவிர்க்கப்பட்டது. ஓட்டுநர் மற்றும் நடத்துநர் உட்பட காயமடைந்தவர்கள் வாடிப்பட்டி அரசு மருத்துவமனைக்கு அனுப்பி வைக்கப்பட்டனர்.
வாடிப்பட்டி காவல் துறையினர் வழக்குப்பதிவு செய்து விசாரணை நடத்தி வருகின்றனர். இப்பகுதியில் அடிக்கடி விபத்துகள் நடப்பதால், சாலை நடுவே உயரமான கான்கிரீட் தடுப்புகளை அமைக்க வேண்டும் என பொதுமக்கள் கோரிக்கை விடுத்துள்ளனர்.
செய்தி மூலம்: இந்து தமிழ் திசை