வலி நிவாரண மாத்திரைகளை பொடியாக்கி போதை ஊசி: பாதிக்கபட்ட இளைஞர்கள் சிகிச்சைக்கு வரத் தொடங்கியிருப்பதால் மருத்துவர்கள் அதிர்ச்சி

வலி நிவாரண மாத்திரைகளை பொடியாக்கி, போதை ஊசியாகச் செலுத்தி அடிமையாகும் இளைஞர்களின் எண்ணிக்கை அதிகரித்து வருவது மனநல மருத்துவர்களிடையே பெரும் அதிர்ச்சியை ஏற்படுத்தியுள்ளது. கரோனா ஊரடங்கு காலத்தில் மாணவர்கள் போதைப்பழக்கத்திற்கு ஆளாகியிருக்கலாம் என்று கருதப்படுகிறது.

இது குறித்து விருதுநகர் அரசு மருத்துவக் கல்லூரி மனநலத்துறை உதவி பேராசிரியர் டாக்டர் பி.ஆர். சதீஷ் சங்கர் கூறியதாவது: வலி நிவாரணிகளைப் போதைப்பொருளாகப் பயன்படுத்தும் போக்கு சமீபகாலமாக அதிகரித்து வருகிறது. கடுமையான வலியைப் போக்கப் பயன்படுத்தப்படும் இந்த மாத்திரைகளை ஊசி மூலம் உடலில் செலுத்துவது ஆபத்தானது.

போதைக்காக மாத்திரைகளைப் பயன்படுத்துவதால் இளைஞர்களுக்கு மனநல பாதிப்புகள், தூக்கமின்மை, உடல் நடுக்கம், எலும்பு வலி போன்ற தீவிர பாதிப்புகள் ஏற்படுகின்றன. இத்தகைய இளைஞர்கள் தற்போது மனநல சிகிச்சைக்காக மருத்துவமனைகளை அணுகத் தொடங்கியுள்ளனர். மருத்துவரின் பரிந்துரை சீட்டு இல்லாமல் இத்தகைய மருந்துகளை விற்கக்கூடாது என்று மத்திய அரசு ஏற்கனவே கட்டுப்பாடு விதித்துள்ளது.

செய்தி மூலம்: இந்து தமிழ் திசை