மீனவர்கள், பொதுமக்களை பாதிக்கும் நீலப் பொருளாதார திட்டத்தை திரும்ப பெற வேண்டும்: மத்திய அரசுக்கு கடலோர மக்கள் வாழ்வுரிமை இயக்கம் வேண்டுகோள்

நாகப்பட்டினத்தில் கடலோர மக்கள் வாழ்வுரிமை இயக்கம் சார்பில் மாநில பயிலரங்கம் நேற்று நடைபெற்றது. இதில் மாநில ஒருங்கிணைப்பாளர் ரமேஷ் பாபு, நாகை மாலி மற்றும் பிற மாவட்ட பிரதிநிதிகள் கலந்துகொண்டனர். இந்த பயிலரங்கில் நீலப் பொருளாதாரம் குறித்த அறிமுகமும், அதன் தாக்கம் குறித்த விவாதங்களும் நடைபெற்றன.

இந்த நீலப் பொருளாதாரத் திட்டம் கடல் வளங்களை தனியாருக்கு தாரை வார்க்கும் வகையில் உள்ளது. கடற்கரை பகுதிகளில் தனியார் நிறுவனங்களின் ஆக்கிரமிப்புகள், இறால் பண்ணைகள் மற்றும் ஹைட்ரோ கார்பன் திட்டங்களால் மீனவர்களின் வாழ்வாதாரம் கடுமையாக பாதிக்கப்படுகிறது. எனவே, பொதுமக்கள் மற்றும் மீனவர்களின் வாழ்வாதாரத்தை பாதிக்கும் இத்திட்டத்தை மத்திய அரசு உடனடியாகத் திரும்பப் பெற வேண்டும் என்று அவர்கள் வலியுறுத்தினர்.

மேலும், இத்திட்டங்களுக்கு எதிராக மீனவர்கள் மற்றும் அனைத்து தரப்பு மக்களையும் ஒன்றிணைத்து பேரணி மற்றும் போராட்டங்கள் நடத்த திட்டமிட்டுள்ளதாக அவர்கள் தெரிவித்தனர்.

செய்தி மூலம்: இந்து தமிழ் திசை