கொள்முதல் இலக்கு முடிந்ததாகக் கூறி கொள்முதல் நிறுத்தம்: நெல் மணிகள் மழையில் நனைந்து வீணாகும் அவலம்

புதுக்கோட்டை மாவட்டத்தில் நெல் கொள்முதல் நிலையங்கள் மூடப்பட்டதால், விவசாயிகள் அறுவடை செய்த நெல் மணிகள் மழையில் நனைந்து சேதமடைந்துள்ளன. தற்போதைய கோடை பருவத்தில் 10 கி.மீ. சுற்றளவுக்கு ஒரு நிலையம் வீதம் கொள்முதல் நிலையங்கள் திறக்கப்பட்டன. எனினும், குறிப்பிட்ட கொள்முதல் நிலையம் அமைந்திருக்கும் கிராமத்தின் விளைச்சலை மட்டுமே கணக்கில் கொண்டு இலக்கு நிர்ணயிக்கப்படுவதால், கொள்முதல் இலக்கு விரைவில் முடிந்துவிடுவதாக அதிகாரிகள் நிலையங்களை மூடிவிடுகின்றனர்.

இதனால், சுற்றுவட்டார கிராமங்களைச் சேர்ந்த விவசாயிகள் நெல் மணிகளைக் கொள்முதல் நிலையங்களில் குவித்து வைத்திருந்தாலும், விற்பனை செய்ய முடியாமல் பாதிக்கப்பட்டுள்ளனர். எனவே, சுற்றியுள்ள கிராமங்களின் சாகுபடி பரப்பையும் கணக்கில் எடுத்து, நெல் கொள்முதல் பணியைத் தொடர்ந்து மேற்கொள்ள வேண்டும் என்று விவசாயிகள் கோரிக்கை விடுத்துள்ளனர். வருவாய் மற்றும் நுகர்பொருள் வாணிபக் கழக அலுவலர்கள் இதுகுறித்து உரிய தீர்வு காண்பதாக உறுதியளித்துள்ளனர்.

செய்தி மூலம்: இந்து தமிழ் திசை