மதுரை-தொண்டி சாலை தேசிய நெடுஞ்சாலை ஆணையத்தின் கட்டுப்பாட்டுக்கு மாற்றம்

மதுரை-தொண்டி இடையிலான சாலை, தேசிய நெடுஞ்சாலைத் துறையிலிருந்து தேசிய நெடுஞ்சாலை ஆணையத்தின் கட்டுப்பாட்டுக்கு மாற்றப்பட்டுள்ளது. இதைத்தொடர்ந்து, நான்கு வழிச்சாலையாக மாற்றும் பணிகளுக்கான திட்ட மதிப்பீடு தயாரிக்கும் நடவடிக்கைகள் தொடங்கியுள்ளன.

மதுரை, திருப்புவனம், பூவந்தி, சிவகங்கை, காளையார்கோவில், சருகணி, திருவாடனை வழியாக தொண்டிக்குச் செல்லும் இந்த சாலை, வணிக ரீதியாக முக்கியத்துவம் வாய்ந்தது. நீண்ட நாட்களாக கிடப்பில் இருந்த இந்த நான்கு வழிச்சாலைத் திட்டம் தற்போது முன்னெடுக்கப்பட்டுள்ளது.

சாலை விரிவாக்கத்திற்காக 45 மீட்டர் அகலத்தில் நிலம் கையகப்படுத்தப்பட உள்ளது. சாலை இருபுறமும் தலா 9 மீட்டர் அகலத்தில் சாலை மற்றும் மையப்பகுதியில் 1.5 மீட்டர் தடுப்புச் சுவர் அமைக்கத் திட்டமிடப்பட்டுள்ளது. ஆய்வுப் பணிகள் முடிந்து விரைவில் ஒப்பந்தப்புள்ளிகள் கோரப்படும் என அதிகாரிகள் தெரிவித்தனர்.

செய்தி மூலம்: இந்து தமிழ் திசை