வேளாண் அறிவியல் நிலையங்களில் மூத்த விஞ்ஞானிகள் மாற்றப்பட்டதால் முன்னோடி விவசாயிகள் அதிருப்தி

தமிழக அரசு நிதி ஒதுக்கீடு செய்யாததால், மாநிலத்திலுள்ள 4 வேளாண் அறிவியல் நிலையங்களில் பணிபுரிந்த மூத்த விஞ்ஞானிகள் இடமாற்றம் செய்யப்பட்டுள்ளனர். இதனால் முன்னோடி விவசாயிகள் பெரும் அதிருப்தி அடைந்துள்ளனர்.

மத்திய அரசின் நிதியுதவியுடன் நாடு முழுவதும் 731 வேளாண் அறிவியல் நிலையங்கள் செயல்படுகின்றன. இதில், தமிழகத்தில் கால்நடை மருத்துவப் பல்கலைக்கழகக் கட்டுப்பாட்டில் உள்ள காஞ்சிபுரம் மாவட்டம் காட்டுப்பாக்கம், சிவகங்கை மாவட்டம் குன்றக்குடி, நாமக்கல் மற்றும் விழுப்புரம் ஆகிய நான்கு இடங்களில் உள்ள நிலையங்களில் பணிபுரிந்த மூத்த விஞ்ஞானிகள் உள்ளிட்ட 60 பணியாளர்கள் மாற்றப்பட்டுள்ளனர். குறிப்பாக, குன்றக்குடி வேளாண் அறிவியல் நிலையம் நாட்டிலேயே அதிக விருதுகளைப் பெற்ற நிலையில், இத்தகைய நடவடிக்கை எடுக்கப்பட்டுள்ளது விவசாயிகளிடையே அதிருப்தியை ஏற்படுத்தியுள்ளது.

தமிழக அரசு நிதி ஒதுக்கீடு செய்தால்தான் நிரந்தர விஞ்ஞானிகளை நியமிக்க முடியும் என விவசாயிகள் வலியுறுத்தியுள்ளனர்.

செய்தி மூலம்: இந்து தமிழ் திசை