முடுக்கலான்குளம் பள்ளி தலைமை ஆசிரியர் பணியிடத்தை நிரப்ப கோரி போராட்டம்

கோவில்பட்டி அருகே உள்ள முடுக்கலான்குளம் டிஎன்டிடிஏ தொடக்கப்பள்ளியில் தலைமை ஆசிரியர் பணியிடத்தை உடனடியாக நிரப்பக் கோரி மாணவர்கள் மற்றும் பெற்றோர்கள் பள்ளி வளாகத்தில் காத்திருப்பு போராட்டத்தில் ஈடுபட்டனர்.

சுமார் 50 மாணவர்கள் பயிலும் இப்பள்ளியில், 20 நாட்களுக்கு முன்பு தலைமை ஆசிரியை பணி ஓய்வு பெற்றார். இதன் காரணமாக, 5-ம் வகுப்பு மாணவர்களுக்கு பாடம் நடத்த போதிய ஆசிரியர்கள் இல்லாத நிலை ஏற்பட்டுள்ளது. தற்போதுள்ள ஆசிரியைகள் தங்கள் பாடங்களை முடித்த பின் மற்ற வகுப்பு மாணவர்களுக்கு பாடம் எடுக்கின்றனர்.

விரைவில் காலாண்டு தேர்வுகள் வரவுள்ள நிலையில், மாணவர்களின் கல்வி பாதிக்கப்படுவதாக பெற்றோர்கள் கவலை தெரிவிக்கின்றனர். உரிய நடவடிக்கை எடுக்கும் வரை போராட்டம் தொடரும் என அவர்கள் கூறியுள்ளனர்.

செய்தி மூலம்: இந்து தமிழ் திசை