தென் தமிழகத்தில் முதல் முறையாக: 10 வயது சிறுமிக்கு பித்தப்பை அகற்றும் அறுவை சிகிச்சை
தூத்துக்குடி அரசு மருத்துவக் கல்லூரி மருத்துவமனையில் 10 வயது சிறுமிக்கு நவீன லேப்ரோஸ்கோப்பி முறையில் பித்தப்பை அகற்றும் அறுவை சிகிச்சை வெற்றிகரமாக செய்யப்பட்டது.
தூத்துக்குடி அரசு மருத்துவக் கல்லூரி மருத்துவமனையில், 10 வயது சிறுமிக்கு நவீன லேப்ரோஸ்கோப்பி முறையில் பித்தப்பை அகற்றும் அறுவை சிகிச்சை வெற்றிகரமாக மேற்கொள்ளப்பட்டது. தென் தமிழகத்திலேயே இத்தகைய அறுவை சிகிச்சை அரசு மருத்துவமனையில் மேற்கொள்ளப்படுவது இதுவே முதல்முறை என்று மருத்துவர்கள் தெரிவித்தனர்.
புதுக்கோட்டை அருகே கோவங்காடு பகுதியைச் சேர்ந்த சிறுமி முத்துமாரி, கடுமையான வயிற்று வலி மற்றும் வாந்தியால் பாதிக்கப்பட்ட நிலையில் மருத்துவமனையில் அனுமதிக்கப்பட்டார். பரிசோதனையில் சிறுமியின் பித்தப்பை மற்றும் பித்த நாளத்தில் கற்கள் இருப்பது கண்டறியப்பட்டது. மருத்துவர் டி.முத்துக்குமரன் தலைமையிலான மருத்துவக் குழுவினர், நவீன தொழில்நுட்பம் மூலம் அறுவை சிகிச்சை செய்து சிறுமியை குணப்படுத்தினர்.
இது குறித்து மருத்துவர்கள் கூறுகையில், குழந்தைகளிடையே பித்தப்பை கற்கள் ஏற்படுவது அரிதானது. தனியார் மருத்துவமனைகளில் அதிக செலவாகும் இந்தச் சிகிச்சையை, அரசு மருத்துவமனையில் முற்றிலும் இலவசமாகச் செய்துள்ளோம். தற்போது சிறுமி நலமுடன் உள்ளார் என்று தெரிவித்தனர்.
செய்தி மூலம்: இந்து தமிழ் திசை