அம்மா மண்டபம் படித்துறையில் 2 டன் கழிவுகள் அகற்றம்

ஸ்ரீரங்கம் ரங்கநாதர் கோயிலுக்கு வரும் பக்தர்கள் அம்மா மண்டபம் காவிரி படித்துறையில் புனித நீராடுவது வழக்கம். புனித நீராடும்போது பக்தர்கள் விட்டுச் செல்லும் பழைய உடைகள், பூஜை பொருட்கள் மற்றும் பிளாஸ்டிக் கழிவுகள் அங்கு குவிந்து வருவது வாடிக்கையாக உள்ளது.

இந்நிலையில், வரவிருக்கும் ஆடிப் பெருக்கைக் கருத்தில் கொண்டு, திருச்சி மாநகராட்சி நிர்வாகம் சார்பில் அம்மா மண்டபம் படித்துறையில் நேற்று சிறப்பு தூய்மைப் பணிகள் மேற்கொள்ளப்பட்டன. இதில் பிளாஸ்டிக் கழிவுகள் உட்பட 2 டன் திடக்கழிவுகளை 30-க்கும் மேற்பட்ட தூய்மைப் பணியாளர்கள் மற்றும் தன்னார்வலர்கள் அகற்றினர்.

செய்தி மூலம்: இந்து தமிழ் திசை