திருச்சி மாவட்டத்தில் இடைநின்ற 424 அரசுப் பள்ளி மாணவர்கள்; 35 பேர் மீண்டும் பள்ளிகளில் சேர்ப்பு

திருச்சி மாவட்டத்தில் நடப்பு கல்வி ஆண்டில் அரசுப் பள்ளிகளில் 424 மாணவர்கள் கல்வியை பாதியில் நிறுத்தியுள்ளதாக பள்ளி கல்வித் துறை அதிகாரிகள் தெரிவித்துள்ளனர். அவர்களில் இதுவரை 35 பேர் மீண்டும் பள்ளிகளில் சேர்க்கப்பட்டுள்ளனர்.

தொட்டியம், மணிகண்டம், துறையூர், லால்குடி, மணப்பாறை உள்ளிட்ட 16 வட்டாரங்களில் இந்த மாணவர்கள் இடைநின்றுள்ளனர். குடிபெயர்வு, வறுமை, பெற்றோர் உடல்நலக்குறைவு மற்றும் பள்ளிக்குச் செல்ல விருப்பமின்மை போன்றவை இதற்கு முக்கிய காரணங்களாக கண்டறியப்பட்டுள்ளன.

மாணவர்களை மீண்டும் கல்வி கற்க வைக்க ஆசிரியர்கள் தீவிர முயற்சி மேற்கொண்டு வருகின்றனர். தொடர்ந்து ஒரு வாரம் பள்ளிக்கு வராத மாணவர்களின் வீடுகளுக்குச் சென்று அரசு சலுகைகள் குறித்து எடுத்துரைத்து அவர்களை மீண்டும் பள்ளிக்கு அழைத்து வர நடவடிக்கை எடுக்கப்பட்டு வருகிறது.

செய்தி மூலம்: இந்து தமிழ் திசை