ஆழியாறில் வாகனம் மோதியதில் குரங்கு படுகாயம்; வனப்பகுதியில் அதிவேகமாக வாகனங்களை இயக்கினால் நடவடிக்கை

ஆனைமலை அருகே உள்ள ஆழியாறு வனப்பகுதியில், வால்பாறை சாலையில் அடையாளம் தெரியாத கார் மோதியதில் சுமார் 5 வயதுடைய ஆண் குரங்கு ஒன்று படுகாயமடைந்தது. காயமடைந்த குரங்கு சாலையோரத்தில் உயிருக்கு போராடிக்கொண்டிருந்ததைக் கண்ட பொதுமக்கள், அதற்கு தண்ணீர் கொடுத்து உதவினர்.

தகவலறிந்து சம்பவ இடத்திற்கு வந்த வனத்துறையினர், காயமடைந்த குரங்கை மீட்டு சிகிச்சைக்காக மருத்துவமனைக்கு அழைத்துச் சென்றனர். ஆழியாறு வனப்பகுதியில் உள்ள சுற்றுலா பயணிகள் வாகனங்களை மெதுவாகவும் கவனமாகவும் இயக்க வேண்டும் என்றும், வன விலங்குகளைக் கண்டால் செல்பி எடுக்கக் கூடாது என்றும் வனத்துறையினர் அறிவுறுத்தினர். மேலும், வனப்பகுதியில் அதிவேகமாக வாகனங்களை இயக்கினால் வன உயிரின பாதுகாப்பு சட்டப்படி நடவடிக்கை எடுக்கப்படும் என அவர்கள் எச்சரித்துள்ளனர்.

செய்தி மூலம்: இந்து தமிழ் திசை