புதுப்பாளையம் ஒன்றியத்தில் ரூ.10.62 கோடி மதிப்பில் வளர்ச்சிப் பணிகள்: ஆட்சியர் ஆய்வு

திருவண்ணாமலை மாவட்டம், புதுப்பாளையம் ஊராட்சி ஒன்றியத்தில் ரூ.10.62 கோடி மதிப்பில் நடைபெற்று வரும் வளர்ச்சிப் பணிகளை மாவட்ட ஆட்சியர் வந்தனா கார்க் நேரில் ஆய்வு செய்தார். செங்கம் வட்டத்தில் மேற்கொள்ளப்பட்டு வரும் பல்வேறு சாலைப் பணிகள் மற்றும் மேம்பாட்டுத் திட்டங்களை அவர் ஆய்வு செய்தார்.

மேல்படூர் அரசு மேல்நிலைப் பள்ளியில் மாணவர்களின் கற்றல் திறனை ஆய்வு செய்த ஆட்சியர், அங்கு கட்டப்பட்டு வரும் சமையலறைக் கூடத்தையும் பார்வையிட்டார். மேலும், காரப்பட்டு பகுதியில் ரூ.65 லட்சம் மதிப்பீட்டில் உயர் மட்டப் பாலம் அமைக்கும் பணியையும் ஆய்வு செய்தார். தரமாகவும், விரைவாகவும் பணிகளை முடிக்க அலுவலர்களுக்கு அறிவுறுத்திய ஆட்சியர், பள்ளி அருகில் வேகத்தடை அமைப்பது உள்ளிட்ட பாதுகாப்பு நடவடிக்கைகளையும் மேற்கொள்ள உத்தரவிட்டார்.

செய்தி மூலம்: இந்து தமிழ் திசை