சிவகாசி மாநகராட்சியில் 20-க்கும் மேற்பட்ட காலி பணியிடங்களால் அடிப்படை பணிகள் பாதிப்பு

சிவகாசி மாநகராட்சியில் மாநகர் பொறியாளர், உதவி ஆணையர்கள் உட்பட 20-க்கும் மேற்பட்ட பணியிடங்கள் காலியாக உள்ளதால் அடிப்படை பணிகள் கடுமையாக பாதிக்கப்பட்டுள்ளன. பல பொறுப்புகளில் அதிகாரிகள் இல்லாததால், தற்போதுள்ள பணியாளர்கள் கூடுதல் பணிச்சுமையால் தவித்து வருகின்றனர்.

திருத்தங்கல் மற்றும் சிவகாசி நகராட்சிகள் இணைக்கப்பட்டு 2021-ல் மாநகராட்சியாக தரம் உயர்த்தப்பட்ட போதிலும், பல முக்கிய பணியிடங்கள் நீண்டகாலமாக நிரப்பப்படாமல் உள்ளன. பொறியியல் பிரிவில் மாநகர் பொறியாளர் பணியிடம் காலியாக உள்ள நிலையில், உதவி பொறியாளர்கள் மற்றும் தொழில்நுட்ப உதவியாளர்களும் போதிய எண்ணிக்கையில் இல்லை. இதனால் மாநகராட்சியில் நடைபெற்று வரும் சாலைப் பணிகள், புதிய கட்டுமானங்கள் மற்றும் வணிக வளாகப் பணிகள் தேக்கமடைந்துள்ளன.

வருவாய் மற்றும் நகரமைப்பு பிரிவுகளிலும் காலிப்பணியிடங்கள் அதிகம் இருப்பதால், புதிய சொத்து வரி தீர்வை மற்றும் கட்டிட அனுமதி வழங்குவதில் தாமதம் நிலவுகிறது. நான்கு மண்டலங்களுக்கும் உதவி ஆணையர்கள் இல்லாததால், பொதுமக்கள் அடிப்படை சேவைகளுக்காக மாநகராட்சி அலுவலகத்திற்கு அலைய வேண்டிய சூழல் உள்ளது. காலிப்பணியிடங்களை நிரப்பவும், கூடுதலாக பணியிடங்களை ஒதுக்க அரசு நடவடிக்கை எடுக்க வேண்டும் என கவுன்சிலர்களும் பொதுமக்களும் வலியுறுத்துகின்றனர்.

செய்தி மூலம்: இந்து தமிழ் திசை