விபத்தில் சிறுமி உயிரிழந்த வழக்கில் தொழிலாளிக்கு 2 ஆண்டுகள் சிறை

ராஜபாளையம் அருகே 2015-ம் ஆண்டு நடந்த சாலை விபத்தில் சிறுமி உயிரிழந்த வழக்கில், மாட்டுவண்டி ஓட்டி வந்த தொழிலாளிக்கு 2 ஆண்டுகள் சிறை தண்டனை விதித்து ராஜபாளையம் நீதிமன்றம் தீர்ப்பளித்தது.

சோலைச்சேரியைச் சேர்ந்த கணேசன் (47) என்பவர் ஓட்டி வந்த மாட்டுவண்டி, கிருஷ்ணா பகுதியைச் சேர்ந்த மாரிமுத்து-புவனேஸ்வரி தம்பதியின் 12 வயது மகள் வரஷா மீது மோதியது. இந்த விபத்தில் சிறுமி சம்பவ இடத்திலேயே உயிரிழந்தார். இந்த வழக்கினை விசாரித்த ராஜபாளையம் சார்பு நீதிமன்ற நீதிபதி சுந்தர காமேஷ், குற்றம் சாட்டப்பட்ட கணேசனுக்கு 2 ஆண்டுகள் சிறை தண்டனையும், ரூ.10 ஆயிரம் அபராதமும் விதித்து உத்தரவிட்டார். மேலும், பாதிக்கப்பட்ட சிறுமியின் குடும்பத்திற்கு ரூ.50 ஆயிரம் இழப்பீடு வழங்கவும் நீதிமன்றம் உத்தரவிட்டது.

செய்தி மூலம்: இந்து தமிழ் திசை