செங்கல்பட்டு அருகே நள்ளிரவில் ரயில்வே கேட் மூடல்: சாலை துண்டிப்பால் கிராம மக்கள் போராட்டம்

செங்கல்பட்டு அருகே உள்ள ஆத்தூர் – வடபாதி ரயில்வே கேட், தெற்கு ரயில்வே நிர்வாகத்தால் நள்ளிரவில் திடீரென மூடப்பட்டு சாலை தோண்டப்பட்டது. இதனால் இப்பகுதியைச் சேர்ந்த 2,000-க்கும் மேற்பட்ட குடும்பங்கள் போக்குவரத்து வசதியின்றி கடும் அவதிக்குள்ளாகியுள்ளனர்.

இந்த ரயில்வே கேட் வழியாகத்தான் இப்பகுதியைச் சேர்ந்த மக்கள் தங்களின் அன்றாட வேலைகளுக்கும், சுமார் ஆயிரம் ஏக்கர் விவசாய நிலங்களுக்குச் செல்லவும் பயன்படுத்தி வந்தனர். தற்போது மாற்று வழியாகக் கூறப்படும் சுரங்கப்பாதை மிகவும் குறுகலாக இருப்பதால், கனரக வாகனங்கள் மற்றும் விவசாய உபகரணங்களை எடுத்துச் செல்ல முடியாமல் விவசாயிகள் சிரமப்படுகின்றனர்.

ரயில்வே மேம்பாட்டுப் பணிக்காக இந்த கேட் மூடப்படுவதாகவும், மாற்றுப் பாதையைப் பயன்படுத்துமாறும் ரயில்வே நிர்வாகம் அறிவுறுத்தியிருந்தது. இதற்கு எதிர்ப்பு தெரிவித்து கிராம மக்கள் சாலை மறியலில் ஈடுபட்டனர். போராட்டக்காரர்களுடன் பேச்சுவார்த்தை நடத்திய போலீஸார், 11 பேரை கைது செய்து தனியார் மண்டபத்தில் தங்கவைத்தனர். சுரங்கப்பாதையில் தண்ணீர் தேங்கும் அபாயம் உள்ளதால், அதற்குப் பதிலாக மேம்பாலம் அமைக்க வேண்டும் என்று மக்கள் கோரிக்கை விடுத்துள்ளனர்.

செய்தி மூலம்: இந்து தமிழ் திசை