திருக்கழுக்குன்றம் அருகே பாலாற்றில் மணல் திருட்டு: மாட்டு வண்டியுடன் 6 பேர் கைது

திருக்கழுக்குன்றம் அடுத்த நல்லாத்தூர் மற்றும் ஆலவாய் ஆகிய பகுதிகளில் பாலாற்றில் மணல் திருட்டு நடைபெறுவதாக போலீஸாருக்கு ரகசியத் தகவல் கிடைத்தது. அதன் அடிப்படையில் போலீஸார் அப்பகுதியில் தீவிர கண்காணிப்பில் ஈடுபட்டனர்.

அப்போது, பாலாற்றில் மாட்டு வண்டியில் மணல் கடத்திக் கொண்டிருந்த 6 நபர்களை போலீஸார் கையும் களவுமாகப் பிடித்துக் கைது செய்தனர். கைதானவர்கள் ராமு (46), சுரேஷ் (40), வெங்கடேசன் (35), மாரிமுத்து (44), சுகன் (27) மற்றும் பிரபு (44) என அடையாளம் காணப்பட்டனர். அவர்களிடமிருந்து மணல் மற்றும் மாட்டு வண்டிகள் பறிமுதல் செய்யப்பட்டன.

அதே நேரத்தில், மணல் திருட்டில் ஈடுபட்டிருந்த பாஸ்கர், மோகன் மற்றும் பன்னீர் ஆகிய மூவர் அங்கிருந்து தப்பித்து ஓடினர். அவர்களைத் தேடும் பணியில் போலீஸார் ஈடுபட்டுள்ளனர். மழையில்லாததால் பாலாறு வறண்டு காணப்படுவதைப் பயன்படுத்தி இந்த மணல் திருட்டு நடைபெற்றுள்ளது.

செய்தி மூலம்: இந்து தமிழ் திசை