ஹோர்முஸ் நீரிணையை மீண்டும் கப்பல் போக்குவரத்துக்குத் திறப்பது தொடர்பாக ஈரான் முன்வைத்த சமாதான ஒப்பந்தத்தை அமெரிக்க அதிபர் டொனால்ட் டிரம்ப் நிராகரித்துள்ளார். உலக எரிசக்தி விநியோகத்தில் மிக முக்கியமானதாகக் கருதப்படும் இந்த நீரிணை, கடந்த ஏழு மாதங்களாக அமெரிக்கா மற்றும் ஈரான் இடையிலான மோதலின் மையப்புள்ளியாக இருந்து வருகிறது.
வாஷிங்டனில் செய்தியாளர்களிடம் பேசிய டிரம்ப், ஈரான் முன்வைத்த ஒப்பந்தத்தை தான் நிராகரித்துவிட்டதாகத் தெரிவித்தார். இது குறித்து அவர் கூறுகையில், 'அவர்கள் ஒரு ஒப்பந்தத்தை முன்வைத்தனர், ஆனால் நான் அதை நிராகரித்துவிட்டேன். அவர்கள் மிகவும் மோசமான நிலையில் இருப்பதால், உடனடியாக நீரிணையைத் திறந்து ஒப்பந்தம் செய்ய விரும்புகிறார்கள்.
ஒப்பந்தம் செய்வதில் எனக்கு விருப்பம்தான், ஆனால் இது குறித்து நான் முடிவெடுப்பேன்' என்று குறிப்பிட்டார். ஐக்கிய நாடுகள் பொதுச் சபையில் பங்கேற்றுவிட்டு தெஹ்ரான் திரும்பும் வழியில், ஈரான் அதிபர் மசூத் பெசெஷ்கியன் சிபிஎஸ் செய்தி நிறுவனத்திடம் பேசுகையில், இந்த ஒப்பந்தம் ஈரானின் உயர்மட்டத் தலைவர் அயதுல்லா அலி கமேனியுடன் கலந்தாலோசித்து உருவாக்கப்பட்டதாகத் தெரிவித்தார்.
மேற்கு ஆசியாவில், குறிப்பாக லெபனானில் நடைபெற்று வரும் அனைத்து மோதல்களையும் நிறுத்துவது இந்தத் திட்டத்தின் நோக்கம் என்று ஈரானின் வெளியுறவுத்துறை அமைச்சர் அப்பாஸ் அராக்ஜி தெரிவித்தார். அமெரிக்காவின் தூதர் ஸ்டீவ் விட்காஃப்பைச் சந்தித்த அராக்ஜி, இந்த ஒப்பந்தம் ஏற்கனவே கையெழுத்தான புரிந்துணர்வு ஒப்பந்தத்தின் அடிப்படையில் அமைந்திருப்பதாகக் கூறினார்.
இதன்படி, ஈரானின் முடக்கப்பட்ட சொத்துக்களை விடுவித்தல், எண்ணெய் மீதான தடைகளை நீக்குதல் மற்றும் அமெரிக்காவின் கடற்படை முற்றுகையை முடிவுக்குக் கொண்டுவருதல் ஆகிய நிபந்தனைகள் நிறைவேற்றப்பட்டால், ஏழு நாட்களுக்குள் ஹோர்முஸ் நீரிணை திறக்கப்படும் என்று ஈரான் தரப்பில் தெரிவிக்கப்பட்டது. இதற்கிடையில், ஐக்கிய நாடுகள் சபையில் பேசிய சவுதி அரேபியாவின் வெளியுறவுத்துறை அமைச்சர் பைசல் பின் ஃபர்ஹான், ஹோர்முஸ் மற்றும் பாப் அல்-மண்டேப் நீரிணைகளைப் பாதுகாப்பதில் சர்வதேச சமூகம் தவறிவிட்டதாகக் குற்றம் சாட்டினார்.
இந்த நீரிணைகளை அரசியல் அழுத்தங்களுக்காகப் பயன்படுத்துவதை சவுதி அரேபியா எதிர்ப்பதாக அவர் வலியுறுத்தினார். இதற்கிடையில், ஈரான் அதிபர் பெசெஷ்கியன் ஐநா பொதுச்செயலாளர் அன்டோனியோ குட்டெரஸைச் சந்தித்தபோது, ஈரான் பேச்சுவார்த்தைக்குத் தயாராக இருந்தாலும், அமெரிக்காவின் கடந்தகால செயல்பாடுகளால் அந்நாட்டின் மீது நம்பிக்கை இல்லை என்று தெரிவித்தார்.
இருப்பினும், அமெரிக்கா தனது நிலைப்பாட்டை மாற்றிக்கொள்ளவில்லை. டிரம்ப் தனது ட்ரூத் சோஷியல் தளத்தில் ஹோர்முஸ் நீரிணையை 'டிரம்ப் நீரிணை' என்று குறிப்பிட்டு வரைபடம் ஒன்றை வெளியிட்டார். மேலும், ஈரான் தனது நிபந்தனைகளை நிறைவேற்றும் என்று டிரம்ப் நம்பவில்லை என்றும், அமெரிக்கா தனது வான்வழித் தாக்குதல்களைத் தொடரும் என்றும் வால் ஸ்ட்ரீட் ஜேர்னல் செய்தி வெளியிட்டுள்ளது.
ஈரானின் புரட்சிகர காவலர் படையின் செய்தித் தொடர்பாளர் ஹொசைன் மொஹேபி கூறுகையில், ஈரானின் ஏழு நிபந்தனைகள் நிறைவேற்றப்படும் வரை அமெரிக்காவிற்கு எதிரான நடவடிக்கைகள் தொடரும் என்று எச்சரித்தார். கடந்த ஜூன் மாதம் இரு நாடுகளுக்கும் இடையே கையெழுத்தான புரிந்துணர்வு ஒப்பந்தம், ஈரானியக் கப்பல்கள் மீதான தாக்குதல்கள் மற்றும் அமெரிக்காவின் பதிலடித் தாக்குதல்களால் தோல்வியடைந்தது குறிப்பிடத்தக்கது.
