வங்கக்கடலில் நிலவும் ஆழ்ந்த காற்றழுத்த தாழ்வு மண்டலம் இன்று அர்னாப் புயலாக வலுப்பெற உள்ளது. இது வடமேற்கு திசையில் நகர்ந்து, அக்டோபர் 28-ம் தேதி முற்பகல் ஆந்திராவின் பாபட்லா மற்றும் விசாகப்பட்டினம் இடையே மிக தீவிர புயலாக கரையை கடக்கும் என சென்னை வானிலை ஆய்வு மையம் தெரிவித்துள்ளது. அப்போது மணிக்கு 140 கி.மீ. வேகத்தில் சூறாவளிக் காற்று வீசக்கூடும் என்று எச்சரிக்கப்பட்டுள்ளது.
இந்த புயல் காரணமாக இன்று புதுக்கோட்டை, சிவகங்கை மற்றும் ராமநாதபுரம் மாவட்டங்களில் கன முதல் மிக கனமழை பெய்ய வாய்ப்புள்ளது. மேலும், தமிழகத்தின் பல்வேறு தென் மாவட்டங்களில் இடி, மின்னலுடன் கூடிய கனமழை பெய்யக்கூடும் என்று வானிலை ஆய்வு மையம் குறிப்பிட்டுள்ளது. சென்னை மற்றும் புறநகர் பகுதிகளில் வானம் மேகமூட்டத்துடன் காணப்படுவதோடு, மிதமான மழைக்கு வாய்ப்புள்ளது.
மீனவர்கள் இன்று தமிழக கடலோரப் பகுதிகள், மன்னார் வளைகுடா மற்றும் குமரிக்கடல் பகுதிகளுக்குச் செல்ல வேண்டாம் என அறிவுறுத்தப்பட்டுள்ளனர். அக்டோபர் 27 மற்றும் 28-ம் தேதிகளில் வட தமிழக கடலோரப் பகுதிகளில் பலத்த காற்று வீசக்கூடும் என்பதால், மீனவர்கள் எச்சரிக்கையுடன் இருக்குமாறு வானிலை ஆய்வு மையம் கேட்டுக்கொண்டுள்ளது.
