தமிழ்நாட்டில் கனிம வளத்துறை டிஜிட்டல் மயமாகிறது

தமிழ்நாடு அரசு தனது இயற்கை வளத்துறையில் பெரிய அளவிலான மாற்றங்களைக் கொண்டுவரத் திட்டமிட்டுள்ளது. இதன் ஒரு பகுதியாக, கனிம வளங்கள் தொடர்பான செயல்பாடுகளை டிஜிட்டல் மயமாக்கவும், ஆன்லைன் மூலம் கண்காணிப்பை பலப்படுத்தவும் அரசு முடிவு செய்துள்ளது. இந்த நடவடிக்கைகளின் மூலம், வரும் ஆண்டுகளில் கனிம வளத்துறை மூலம் கிடைக்கும் வருவாயை இருமடங்காக உயர்த்த அரசு இலக்கு நிர்ணயித்துள்ளது. முதல் ஆண்டில் சுமார் 6,500 கோடி ரூபாயும், நீண்ட கால அடிப்படையில் 9,000 கோடி ரூபாயும் வருவாய் ஈட்ட முடியும் என அதிகாரிகள் எதிர்பார்க்கின்றனர். கடந்த 2025-26 நிதியாண்டில், சுரங்க குத்தகை கட்டணம், முக்கிய கனிமங்கள், நில வரி, ராயல்டி மற்றும் பசுமை நிதி, மாவட்ட கனிம அறக்கட்டளை பங்களிப்புகள் மூலம் சுமார் 4,500 கோடி ரூபாய் வருவாய் கிடைத்தது. தற்போது, குத்தகைக்கு விடப்பட்ட மற்றும் விடப்படாத நிலங்களில் இருந்து எடுக்கப்படும் கணிசமான கனிமங்கள், நில வரி வரம்பிற்குள் வராததால், அவற்றிற்கான ராயல்டி வசூலிப்பதில் சிக்கல் நீடிக்கிறது. இதற்கிடையில், அண்டை மாநிலங்களுக்கு கட்டுமானப் பொருட்களைக் கொண்டு செல்வதற்கு விதிக்கப்பட்ட மூன்று மாத தடையால், அந்தப் பொருட்களின் போக்குவரத்து 15 சதவீதம் குறைந்துள்ளது.