நாசாவின் அப்போலோ நிலவுப் பயணங்களுக்குத் தேவையான மென்பொருளை உருவாக்கிய கணினி விஞ்ஞானி மார்கரெட் ஹாமில்டன் தனது 90-வது வயதில் காலமானார். அவர் செப்டம்பர் 30-ம் தேதி காலமானதை, அவர் மென்பொருள் பொறியியல் பிரிவின் தலைவராகப் பணியாற்றிய மாசசூசெட்ஸ் தொழில்நுட்ப நிறுவனம் (MIT) உறுதிப்படுத்தியது. அவரது மறைவுக்கான காரணம் குறித்த விவரங்கள் வெளியிடப்படவில்லை.
அப்போலோ விண்கலங்களின் கட்டளை தொகுதிகள் மற்றும் நிலவில் தரையிறங்கும் கலன்களுக்கான மென்பொருளை வடிவமைக்க 100 பொறியாளர்கள் கொண்ட குழுவை ஹாமில்டன் வழிநடத்தினார். மென்பொருள் பொறியியலை ஒரு தொழில்முறை துறையாக நிலைநிறுத்தியதில் இவருக்கு முக்கிய பங்கு உண்டு. 1969-ம் ஆண்டு நடந்த அப்போலோ 11 பயணத்தின்போது, நிலவில் தரையிறங்குவதற்கு சில நிமிடங்களுக்கு முன்பு ஏற்பட்ட செயலாக்கப் பிழையை இவரது மென்பொருள் தானாகவே சரிசெய்து விண்கலத்தைப் பாதுகாத்தது குறிப்பிடத்தக்கது.
தனது பணிக்காலத்தில் 2016-ம் ஆண்டு அமெரிக்காவின் உயரிய விருதான 'பிரசிடென்ஷியல் மெடல் ஆஃப் ஃப்ரீடம்' மற்றும் 2003-ம் ஆண்டு நாசாவின் 'எக்ஸப்ஷனல் ஸ்பேஸ் ஆக்ட்' விருது உள்ளிட்ட பல கௌரவங்களைப் பெற்றுள்ளார். மென்பொருள் துறை வளர்ச்சியின் தொடக்கக் காலத்திலேயே மேம்பட்ட குறியீடுகளை உருவாக்கிய தொலைநோக்கு பார்வையாளர் என்று எம்ஐடியின் ஆலிவர் டி வெக் அவரைப் புகழாரம் சூட்டியுள்ளார். நம்பகமான மென்பொருள் அமைப்புகளை வடிவமைப்பதில் இவரது பங்களிப்பு இன்றும் அடிப்படையாகக் கருதப்படுகிறது.
