மணிப்பூரின் காம்ஜோங், உக்ருல் மற்றும் காங்போக்பி மாவட்டங்களில் கடந்த 24 மணி நேரத்தில் நிகழ்ந்த வன்முறைச் சம்பவங்களில் 3 பேர் உயிரிழந்துள்ளனர். காம்ஜோங் மாவட்டம் சாசாட் கிராமத்தில் ஆயுதமேந்திய குழுக்களிடையே நடந்த துப்பாக்கிச் சூட்டில் 42 வயது பெண் மற்றும் 23 வயது இளைஞர் உயிரிழந்தனர். அதேபோல், உக்ருல் மாவட்டத்தில் வாகனத்தில் சென்ற 40 வயது நபர் ஒருவர் சுட்டுக் கொல்லப்பட்டார். வன்முறையைக் கட்டுப்படுத்த காம்ஜோங்கின் சில பகுதிகளில் பிஎன்எஸ்எஸ் பிரிவு 163-ன் கீழ் தடை உத்தரவு பிறப்பிக்கப்பட்டுள்ளது. காங்போக்பி மாவட்டத்தில் வீடுகள் எரிக்கப்பட்டதோடு கடுமையான துப்பாக்கிச் சூடு நடந்ததால், சனிக்கிழமை மாலை முதல் 24 மணி நேர முழு அடைப்பு போராட்டத்திற்கு பழங்குடியின ஒற்றுமைக் குழு அழைப்பு விடுத்துள்ளது.
காம்ஜோங் காவல் நிலையம் எரிக்கப்பட்டதாக சமூக வலைதளங்களில் பரவும் தகவல்களை காவல்துறை மறுத்துள்ளது. முன்னாள் முதலமைச்சர் என். பிரேன் சிங் இது குறித்து கருத்து தெரிவித்திருந்த நிலையில், காவல்துறை இந்த மறுப்பை வெளியிட்டுள்ளது. கிராம தன்னார்வலர்கள் கைது செய்யப்பட்டதை எதிர்த்துப் போராடியபோது அந்தப் பெண் கொல்லப்பட்டதாக குக்கி அமைப்புகள் குற்றம் சாட்டியுள்ளன. பிப்ரவரி முதல் குக்கி மற்றும் நாகா சமூகத்தினரிடையே நிலவும் மோதலில் இதுவரை 40-க்கும் மேற்பட்டோர் உயிரிழந்துள்ள நிலையில், நிலைமையைக் கட்டுக்குள் கொண்டுவர பாதுகாப்புப் படையினர் தீவிர நடவடிக்கைகளை மேற்கொண்டு வருகின்றனர்.
