அமெரிக்க இடைத்தேர்தலில் பொருளாதார விவகாரமே வாக்காளர்களின் முதன்மையான கவலையாக இருப்பதாக 79,000-க்கும் மேற்பட்டவர்களிடம் நடத்தப்பட்ட முக்கிய ஆய்வு ஒன்றில் தெரியவந்துள்ளது. இதில் 39 சதவீத வாக்காளர்கள் பொருளாதாரத்தை மிக முக்கியமான பிரச்சினையாகக் குறிப்பிட்டுள்ளனர். ஜனநாயகத்தின் நிலை குறித்து 32 சதவீதத்தினரும், குடியேற்றம் குறித்து 14 சதவீதத்தினரும் கவலை தெரிவித்துள்ளனர். மேலும், 75 சதவீத வாக்காளர்கள் நாட்டின் தற்போதைய பொருளாதார நிலை மோசமாக இருப்பதாகக் கருத்து தெரிவித்துள்ளனர். கடந்த ஓராண்டில் பணவீக்கத்தால் தங்களுக்கு நிதி நெருக்கடி ஏற்பட்டதாக 10-ல் 8 வாக்காளர்கள் கூறியுள்ளனர். இதில் பெரும்பாலோர் விலை உயர்வுக்கு அதிபர் டிரம்பின் கொள்கைகளே காரணம் என்று குற்றம் சாட்டியுள்ளனர்.
அமெரிக்க நாடாளுமன்றத்தின் பிரதிநிதிகள் சபையில் உள்ள 435 இடங்களுக்கும், செனட் சபையில் உள்ள 100 இடங்களில் 35 இடங்களுக்கும் தேர்தல் நடைபெறுகிறது. வாக்குப்பதிவு முடிவடைந்து வரும் நிலையில், தேர்தல் முடிவுகள் குறித்து வெள்ளை மாளிகை அதிகாரிகள் மிகுந்த எச்சரிக்கையுடன் கூடிய நம்பிக்கையை வெளிப்படுத்தியுள்ளனர். பாதுகாப்பான தொகுதிகளில் முடிவுகள் விரைவில் வெளியாகும் என எதிர்பார்க்கப்படும் நிலையில், கடும் போட்டி நிலவும் தொகுதிகளில் முடிவுகளை உறுதிப்படுத்த கூடுதல் காலம் தேவைப்படலாம் என அதிகாரிகள் தெரிவித்துள்ளனர்.
