அமெரிக்காவின் மத்திய விமான போக்குவரத்து நிர்வாகத்தின் (FAA) விமான போக்குவரத்து சேவைகள் நாடு தழுவிய அளவில் முடங்கியுள்ளதற்கு, பாதுகாப்பு ஒப்பந்த நிறுவனமான எல்3ஹாரிஸ் டெக்னாலஜிஸ் (L3Harris Technologies) நிர்வகிக்கும் நெட்வொர்க்கில் ஏற்பட்ட கோளாறே காரணம் என வால் ஸ்ட்ரீட் ஜர்னல் செய்தி வெளியிட்டுள்ளது. விமானிகளுக்கும் விமான போக்குவரத்து கட்டுப்பாட்டாளர்களுக்கும் இடையிலான வானொலி தொடர்புகளை இந்த நெட்வொர்க் கையாண்டு வருகிறது.
நாடு முழுவதும் 4,400-க்கும் மேற்பட்ட FAA தளங்களை இணைக்கும் தனது உள்கட்டமைப்பு, 29,000-க்கும் அதிகமான தொலைத்தொடர்பு சேவைகளை வழங்கி வருவதாக எல்3ஹாரிஸ் நிறுவனம் தெரிவித்துள்ளது. இருப்பினும், ரேடார் தரவுகள் பாதிக்கப்பட்டுள்ளதா என்பது குறித்த தெளிவான தகவல் இல்லை. இந்த தொழில்நுட்பக் கோளாறுக்கான துல்லியமான காரணம் இன்னும் கண்டறியப்படவில்லை.
விமானங்கள் தரையிறக்கப்படும் இந்த நடவடிக்கை, 2023-ஆம் ஆண்டு ஏற்பட்ட முடக்கத்தை விட நீண்ட நேரம் நீடிப்பதாகத் தகவல்கள் தெரிவிக்கின்றன. இதனால், வெள்ளிக்கிழமை முழுவதும் சில விமான சேவைகள் ரத்து செய்யப்படலாம் என விமான நிறுவனங்கள் எச்சரித்துள்ளன.
