ஹோட்டல் மற்றும் விருந்தோம்பல் துறையின் வைஃபை (Wi-Fi) நெட்வொர்க்குகளைக் குறிவைத்து 'கேப்டிவ் கிரஞ்ச்' (CaptiveCrunch) என்ற பெயரில் அதிநவீன சைபர் தாக்குதல் நடைபெறுவதாக மைக்ரோசாப்ட் நிறுவனத்தின் அச்சுறுத்தல் புலனாய்வு குழு எச்சரித்துள்ளது. ஸ்டார்ம்-2945 (Storm-2945) என்ற ஹேக்கர் குழுவால் நடத்தப்படும் இந்தத் தாக்குதல், கடந்த மே மாதம் முதல் பல்வேறு நாடுகளில் உள்ள ஹோட்டல்கள் மற்றும் மாநாட்டு மையங்களில் செயல்பட்டு வருகிறது. வணிகப் பயணிகளின் கணக்குகளைக் குறிவைக்கும் இந்தத் தாக்குதல், வைஃபை உள்நுழைவுத் திரைகளை (captive portal) கையாளுவதன் மூலம் மேற்கொள்ளப்படுகிறது.
தாக்குதல் நடத்துபவர்கள், ஹோட்டல் விருந்தினர்களை போலியான இணையதளங்களுக்கு அழைத்துச் சென்று, அங்கு மென்பொருள் அப்டேட்கள் அல்லது பாதுகாப்பு சோதனைகள் என்ற பெயரில் போலியான கோப்புகளைப் பதிவிறக்கம் செய்யத் தூண்டுகின்றனர். இதன் மூலம் பயனர்களின் சாதனங்களைக் கட்டுப்படுத்தும் ஹேக்கர்கள், ஆடியோ மற்றும் வீடியோவைப் பதிவு செய்தல், விசைப்பலகை உள்ளீடுகளைத் திருடுதல், கடவுச்சொற்களைக் கைப்பற்றுதல் மற்றும் மின்னஞ்சல்கள் உள்ளிட்ட முக்கியத் தரவுகளைத் திருடும் செயல்களில் ஈடுபடுகின்றனர்.
இந்த ஆபத்தைத் தவிர்க்க, பொது வைஃபை நெட்வொர்க்குகளைப் பயன்படுத்துவதைத் தவிர்த்து, சொந்தமாக செல்லுலார் ஹாட்ஸ்பாட்களை அல்லது பாதுகாக்கப்பட்ட இணைப்புகளைப் பயன்படுத்த வேண்டும் என மைக்ரோசாப்ட் அறிவுறுத்தியுள்ளது. மேலும், ஹோட்டல் நெட்வொர்க்குகளில் இணைந்திருக்கும்போது வரும் எதிர்பாராத மென்பொருள் அப்டேட் கோரிக்கைகளை நிராகரிக்க வேண்டும் என்றும், பணியாளர்கள் பயணத்தின்போது பகிரும் முக்கியத் தரவுகளைக் கட்டுப்படுத்த நிறுவனங்களுக்கு மைக்ரோசாப்ட் பரிந்துரைத்துள்ளது.
