கடந்த நான்கு தசாப்தங்களில் இல்லாத அளவுக்கு மிக வலுவான எல் நினோ நிகழ்வு உருவாகி வருவதாக உலக வானிலை ஆய்வு மையம் (WMO) எச்சரித்துள்ளது. இந்த வானிலை மாற்றம் வரும் மாதங்களில் தீவிரமடைந்து, 2027-ம் ஆண்டு பிப்ரவரி வரை நீடிக்கும் என எதிர்பார்க்கப்படுகிறது. பூமி இதுவரை கண்டிராத தீவிர வானிலை மாற்றங்களின் அபாயக் கட்டத்தில் இருப்பதாக ஐநா பொதுச்செயலாளர் அன்டோனியோ குட்டரெஸ் கவலை தெரிவித்துள்ளார்.
புதைபடிவ எரிபொருட்களால் ஏற்படும் புவி வெப்பமடைதலை இந்த எல் நினோ நிகழ்வு மேலும் தீவிரப்படுத்தும் என நிபுணர்கள் சுட்டிக்காட்டியுள்ளனர். கடல் மேற்பரப்பு வெப்பநிலை சராசரியை விட 3.6 டிகிரி செல்சியஸ் வரை உயரக்கூடும் என கணிக்கப்பட்டுள்ளது.
இது 1997-98 மற்றும் 2015-16 ஆண்டுகளில் ஏற்பட்ட பாதிப்புகளை விட மிக அதிகமாக இருக்கும். இதனால் உலகம் முழுவதும் கடும் வறட்சி, வெள்ளம் மற்றும் அதீத வெப்பம் போன்ற பாதிப்புகள் ஏற்பட வாய்ப்புள்ளது.
இந்த பாதிப்புகளை எதிர்கொள்ளத் தயாராக இருக்குமாறு பேரிடர் மேலாண்மை அமைப்புகளுக்கு உலக வானிலை ஆய்வு மையத்தின் பொதுச்செயலாளர் செலஸ்டே சௌலோ அறிவுறுத்தியுள்ளார். இந்த வானிலை மாற்றத்தால் பாதிக்கப்படக்கூடிய 4.9 மில்லியன் மக்களுக்கு உதவுவதற்காக, சர்வதேச இடம்பெயர்வு அமைப்பு 110 மில்லியன் டாலர் நிதியுதவி கோரியுள்ளது.
இந்த ஆண்டின் இறுதியில் உச்சத்தை எட்டக்கூடிய இந்த எல் நினோ நிகழ்வின் தாக்கம் 2027-ம் ஆண்டு வரை நீடிக்கும் என எதிர்பார்க்கப்படுகிறது.
