இந்தியா தலைமையிலான ஜி20 உச்சிமாநாட்டின் பிரகடனத்தைப் போலவே, பிரிக்ஸ் உறுப்பு நாடுகளும் நீண்ட மற்றும் தீவிரமான பேச்சுவார்த்தைகளுக்குப் பிறகு கூட்டறிக்கையை வெளியிட ஒருமித்த கருத்தை எட்டியுள்ளன. சனிக்கிழமை அதிகாலை 4 மணி வரை நீடித்த இந்த பேச்சுவார்த்தைகளின் முடிவில், 140 பத்திகளைக் கொண்ட இந்த பிரகடனம் இறுதி செய்யப்பட்டது.
மேற்கு ஆசிய மோதல் விவகாரத்தில் ஐக்கிய அரபு அமீரகம் மற்றும் ஈரான் இடையே நிலவிய கருத்து வேறுபாடுகளால் பேச்சுவார்த்தைகளில் சுணக்கம் ஏற்பட்டிருந்தது.
இருப்பினும், ஈரான் அதிபர் மசூத் பெசெஷ்கியன் மற்றும் அபுதாபி பட்டத்து இளவரசர் ஷேக் காலித் பின் முகமது பின் சயீத் அல் நஹ்யான் இடையிலான சந்திப்பு, பதற்றத்தைத் தணித்து உடன்பாட்டை எட்ட உதவியது.
இந்த பிரகடனத்தில், குறிப்பிட்ட நாடுகளை நேரடியாகக் கண்டிக்காமல், ராஜதந்திரம், ஐக்கிய நாடுகள் சபையின் சாசனம் மற்றும் பொதுமக்கள் உள்கட்டமைப்புகளைப் பாதுகாப்பதன் அவசியம் வலியுறுத்தப்பட்டுள்ளது. அமைதியான முறையில் அணுசக்தி வசதிகளைப் பாதுகாத்தல், உலகளாவிய வர்த்தகம் மற்றும் எரிசக்தி விநியோகச் சங்கிலிகளைத் தடையின்றி பராமரித்தல் ஆகியவற்றிற்கு முக்கியத்துவம் அளிக்கப்பட்டுள்ளது.
மேலும், காசாவில் நிலவும் வன்முறை குறித்து ஆழ்ந்த கவலை தெரிவித்துள்ள உறுப்பு நாடுகள், பாலஸ்தீனியர்களை வலுக்கட்டாயமாக வெளியேற்றுவதைத் தடுப்பதில் உறுதியாக இருப்பதாகத் தெரிவித்துள்ளன. பயங்கரவாதத்திற்கு எதிரான கடுமையான கண்டனத்தைப் பதிவு செய்துள்ள பிரிக்ஸ் நாடுகள், பஹல்காம் தாக்குதலைக் குறிப்பிட்டுச் சுட்டிக்காட்டியுள்ளன.
அத்துடன், ஐக்கிய நாடுகள் பாதுகாப்பு கவுன்சிலில் விரிவான சீர்திருத்தங்களைக் கொண்டுவர வேண்டும் என்றும் இந்த பிரகடனம் வலியுறுத்துகிறது.
