அமெரிக்கப் படைகளைப் பாதுகாக்கும் நோக்கில், விண்வெளியில் ஆயுதங்களை நிலைநிறுத்தியுள்ளதாக அமெரிக்கா முதன்முறையாக அதிகாரப்பூர்வமாக உறுதிப்படுத்தியுள்ளது. மேரிலாந்தில் நடைபெற்ற மாநாடு ஒன்றில் அமெரிக்க விமானப்படை செயலாளர் டிராய் மெய்ங்க் இதனைத் தெரிவித்தார். எதிரி நாடுகளுக்கு எச்சரிக்கை விடுக்கும் வகையில் இந்த வியூக ரீதியான அறிவிப்பை வெளியிடுவதாகக் குறிப்பிட்ட அவர், இந்த ஆயுத அமைப்புகளின் தன்மை அல்லது அவை நிலைநிறுத்தப்பட்ட காலம் குறித்த கூடுதல் விவரங்களைத் தெரிவிக்க மறுத்துவிட்டார்.
எதிரிகளின் விண்வெளி அமைப்புகளைச் செயலிழக்கச் செய்யவும், அழிக்கவும் கூடிய இயக்கவியல் மற்றும் இயக்கவியல் அல்லாத ஆயுதங்கள் இதில் அடங்கும் என அமெரிக்க விண்வெளிப் படை விளக்கம் அளித்துள்ளது. 1967-ஆம் ஆண்டின் விண்வெளி ஒப்பந்தம், விண்வெளியில் பேரழிவு ஆயுதங்களை வைப்பதைத் தடை செய்கிறது; ஆனால், செயற்கைக்கோள்களைக் கட்டுப்படுத்தும் வழக்கமான ஆயுதங்களுக்குத் தடை விதிக்கவில்லை. எனவே, இந்த நடவடிக்கைகள் சர்வதேச சட்டங்களுக்கு உட்பட்டே மேற்கொள்ளப்படுவதாக அதிகாரிகள் வலியுறுத்தினர்.
சீனா மற்றும் ரஷ்யா ஆகிய நாடுகள் செயற்கைக்கோள்களைச் செயலிழக்கச் செய்யும் தொழில்நுட்பங்களில் முதலீடு செய்து வரும் சூழலில், அமெரிக்கா தனது விண்வெளி ராணுவ இருப்பை விரிவுபடுத்தி வருகிறது. கோல்டன் டோம் ஏவுகணை பாதுகாப்புத் திட்டத்தை உருவாக்கி வரும் நிலையில் இந்த அறிவிப்பு வெளியாகியுள்ளது. அமெரிக்காவின் இந்த வெளிப்படையான ஒப்புதல், விண்வெளியில் ஆயுதப் போட்டியைத் தீவிரப்படுத்தக்கூடும் என ஆய்வாளர்கள் எச்சரிக்கின்றனர்.
