ஊழியர் வருங்கால வைப்பு நிதி அமைப்பின் (EPFO) கட்டாய வருமான வரம்பை மாதத்திற்கு ரூ.15,000-லிருந்து ரூ.25,000 ஆக உயர்த்துவதற்கு மத்திய அமைச்சரவை ஒப்புதல் அளித்துள்ளது. அமைச்சகங்களுக்கு இடையிலான ஆலோசனைகள் மற்றும் செலவின நிதிக்குழுவின் பரிந்துரைகளைத் தொடர்ந்து, தற்போதைய ஊதிய வளர்ச்சி மற்றும் முறைசார்ந்த வேலைவாய்ப்புப் போக்குகளுக்கு ஏற்ப இந்த சமூகப் பாதுகாப்பு மாற்றத்தை அரசு கொண்டு வந்துள்ளது. 2014-ஆம் ஆண்டு செப்டம்பர் மாதம் முதல் இந்த வரம்பு ரூ.15,000 ஆக நீடித்த நிலையில், தற்போது அது திருத்தப்பட்டுள்ளது.
இந்த மாற்றத்தின் மூலம் கூடுதலாக 51 லட்சம் ஊழியர்கள் சமூகப் பாதுகாப்புத் திட்டத்தின் கீழ் கொண்டுவரப்படுவார்கள் என மத்திய தொழிலாளர் மற்றும் வேலைவாய்ப்பு அமைச்சகம் தெரிவித்துள்ளது. இதன் விளைவாக, ரூ.15,000 முதல் ரூ.25,000 வரை ஊதியம் பெறும் தொழிலாளர்கள் வருங்கால வைப்பு நிதி, ஓய்வூதியத் திட்டம் மற்றும் காப்பீட்டுத் திட்டங்களின் பலன்களைப் பெற முடியும். இந்த நடவடிக்கையானது தொழிலாளர்களின் நீண்டகால ஓய்வுக்கால பாதுகாப்பை வலுப்படுத்துவதோடு, முறைசார்ந்த வேலைவாய்ப்பை ஊக்குவிக்கும் நோக்கம் கொண்டது.
இந்தத் திட்டத்திற்காக ஆண்டுக்கு சுமார் ரூ.11,339 கோடி செலவாகும் என அரசு மதிப்பிட்டுள்ளது; ஐந்து ஆண்டுகளில் இதன் மொத்த செலவு ரூ.56,696 கோடியாக இருக்கும் என கணிக்கப்பட்டுள்ளது. தற்போது, 7.68 லட்சம் நிறுவனங்களில் சுமார் 7.98 கோடி உறுப்பினர்கள் இபிஎஃப்ஓ அமைப்பில் உள்ளனர். இந்த உயர்வு தொழிலாளர்களைத் தக்கவைக்கவும், அவர்களுக்குக் கிடைக்கக்கூடிய சமூகப் பாதுகாப்பு பலன்களை விரிவுபடுத்தவும் உதவும் என்று அதிகாரிகள் தெரிவித்தனர்.
