பிரபல கிரானைட் தொழிலதிபர் ஆர். வீரமணி (85) மீது தொடரப்பட்டுள்ள போக்சோ (POCSO) வழக்கில், கடந்த 20 ஆண்டுகளுக்கும் மேலாக சிறுமிகள் பாலியல் சுரண்டலுக்கு ஆளாக்கப்பட்டிருக்கலாம் என்ற அதிர்ச்சிகரமான தகவல் சென்னை மத்திய குற்றப்பிரிவு (CCB) விசாரணையில் வெளிச்சத்திற்கு வந்துள்ளது. 2003-ம் ஆண்டுக்கும் முன்பிருந்தே இந்தத் துன்புறுத்தல் நிகழ்ந்திருக்கக்கூடும் என காவல்துறை தரப்பில் சந்தேகிக்கப்படுகிறது.
ஏழை மற்றும் பின்தங்கிய குடும்பங்களைச் சேர்ந்த சிறுமிகளை இலக்காகக் கொண்டு, திட்டமிட்ட அடிப்படையில் இந்த பாலியல் சுரண்டல் அரங்கேற்றப்பட்டதாக விசாரணையில் தெரியவந்துள்ளது. இந்த விவகாரம் தொடர்பாக பாதிக்கப்பட்ட மேலும் பல சிறுமிகளின் வாக்குமூலங்கள், சென்னை உயர் நீதிமன்றத்தின் கட்டுப்பாட்டில் இயங்கும் போக்சோ சிறப்பு நீதிமன்றத்தில் பதிவு செய்யப்பட்டுள்ளன.
இந்த வழக்கில் முதன்மைக் குற்றவாளியாக வீரமணி சேர்க்கப்பட்டுள்ளார். அவருக்கு உடந்தையாகச் செயல்பட்டவர்கள் மீதும் போக்சோ சட்டம் மற்றும் தகவல் தொழில்நுட்பச் சட்டத்தின் (IT Act) கீழ் வழக்குகள் பதிவு செய்யப்பட்டுள்ளன. மூத்த காவல் அதிகாரிகளின் மேற்பார்வையில், வீடியோ ஆதாரங்களுடன் இந்த விசாரணை தீவிரமாக நடைபெற்று வருகிறது.
காவல் துறை விசாரணை காலம் நிறைவடைந்ததும், இது தொடர்பான அடுத்தகட்ட நடவடிக்கைகள் மேற்கொள்ளப்படும் எனத் தெரிவிக்கப்பட்டுள்ளது.
