ஆஸ்திரேலியாவில் குடியேற்றக் கொள்கைகள் மற்றும் சர்வதேச மாணவர்களின் விசா நடைமுறைகள் குறித்த விவாதங்கள் தீவிரமடைந்துள்ள நிலையில், அந்நாட்டின் குடியேற்றத்துறை அமைச்சர் டோனி பர்க் முக்கிய விளக்கங்களை அளித்துள்ளார். தேசிய பத்திரிகையாளர் மன்றத்தில் உரையாற்றிய அவர், ஆஸ்திரேலியாவின் பொருளாதார வளர்ச்சிக்கு குடியேற்றம் முக்கியமானது என்பதை ஒப்புக்கொண்ட அதே வேளையில், விசா முறைகேடுகளைத் தடுப்பதில் அரசு உறுதியாக இருப்பதாகத் தெரிவித்தார்.
கட்டுமானத் தொழிலாளர்களை விட அதிக எண்ணிக்கையிலான யோகா ஆசிரியர்கள் நாட்டிற்குள் வருவதாக எதிர்க்கட்சியினர் முன்வைக்கும் குற்றச்சாட்டுகளை அவர் மறுத்தார். இது குறித்து அவர் கூறுகையில், "கட்டுமானத் தொழிலாளர்களை விட யோகா ஆசிரியர்களே அதிகம் வருவதாகத் தொடர்ந்து விமர்சிக்கப்படுகிறது. ஆனால், கடந்த நிதியாண்டில் சுமார் 15,000 கட்டுமானத் தொழிலாளர்கள் நாட்டிற்குள் வந்துள்ளனர்.
இது முந்தைய ஆண்டை விட மூன்று மடங்கு அதிகம். தற்போதைய அரசு பதவியேற்ற பிறகு, யோகா ஆசிரியர்கள் எவரும் புதிதாக வரவில்லை" என்று குறிப்பிட்டார். யோகா ஆசிரியர்கள் தொடர்பான விதிகளுக்கு முந்தைய அரசால் இந்தியாவுடன் மேற்கொள்ளப்பட்ட ஒப்பந்தமே காரணம் என்று அவர் சுட்டிக்காட்டினார்.
ஏப்ரல் 2022-ல் கையெழுத்தாகி, டிசம்பர் 2022 முதல் நடைமுறைக்கு வந்த ஆஸ்திரேலியா-இந்தியா இடையிலான பொருளாதார ஒத்துழைப்பு மற்றும் வர்த்தக ஒப்பந்தத்தின் கீழ், ஆண்டுக்கு 1,800 இந்திய பாரம்பரிய சமையல் கலைஞர்கள் மற்றும் யோகா ஆசிரியர்கள் தற்காலிகமாகப் பணிபுரிய அனுமதிக்கப்படுகின்றனர். இந்த ஒப்பந்தத்தை அப்போதைய உதவி வர்த்தக அமைச்சர் டான் டீஹான் அறிவித்ததாக பர்க் தெரிவித்தார்.
சர்வதேச மாணவர்கள் ஒரு விசா வகையிலிருந்து மற்றொரு விசா வகைக்கு மாறுவது (Visa hopping) குறித்தும் அமைச்சர் கவலை தெரிவித்தார். தகுதியுள்ள மாணவர்கள் படிப்பை முடித்து, வேலைவாய்ப்பு பெற்று, நிரந்தர குடியுரிமை பெறுவது முறையான பாதை என்று அவர் விளக்கினார். ஆனால், நிரந்தர குடியுரிமைக்குத் தகுதியற்றவர்கள், விசா முறைகளைத் தவறாகப் பயன்படுத்தி நீண்ட காலம் தங்குவதை அரசு அனுமதிக்காது என்று அவர் எச்சரித்தார்.
கல்வித் தகுதியை மேம்படுத்தாமல், குடியேற்ற நோக்கத்திற்காக மட்டும் அடிக்கடி படிப்புகளை மாற்றும் மாணவர்களின் போக்கு கட்டுப்படுத்தப்படும் என்றும், மாணவர்கள் உயர்கல்வி நோக்கி முன்னேற வேண்டும் என்றும் அவர் வலியுறுத்தினார். ஆஸ்திரேலிய அரசின் தரவுகளின்படி, 2026-ன் முதல் ஐந்து மாதங்களில் சர்வதேச மாணவர்களில் 16 சதவீதம் பேர் இந்தியர்கள் ஆவர்.
சீன மாணவர்கள் 23 சதவீதத்துடன் முதலிடத்தில் உள்ளனர். இந்த புதிய கொள்கை மாற்றங்கள் இந்திய மாணவர்களைப் பாதிக்கும் என்று எதிர்பார்க்கப்படுகிறது. மேலும், சர்வதேச மாணவர்கள் மற்றும் பட்டதாரி விசா வைத்திருப்பவர்கள் தங்கள் குடும்பத்தினரை அழைத்து வருவதற்கான விதிகளும் கடுமையாக்கப்பட்டுள்ளன.
இருப்பினும், ஏற்கனவே ஆஸ்திரேலியாவில் உள்ள குடும்பங்கள் பிரிக்கப்பட மாட்டார்கள் என்றும், பசிபிக் மற்றும் ஆசியான் நாடுகளைச் சேர்ந்த மாணவர்கள் மற்றும் பிஎச்டி போன்ற குறிப்பிட்ட படிப்புகளில் சேரும் மாணவர்களுக்கு இந்த விதிகளில் விலக்கு அளிக்கப்படும் என்றும் அமைச்சர் டோனி பர்க் தெளிவுபடுத்தினார்.
