ஆஸ்திரேலிய அரசாங்கத்தின் இணையதளம் ஒன்றில் ஓபன் ஏஐ (OpenAI) நிறுவனத்தால் உருவாக்கப்பட்ட செயற்கை நுண்ணறிவு (AI) ஏஜென்ட் ஒன்று அத்துமீறி நுழைந்ததாக ஆஸ்திரேலிய பிரதமர் அந்தோணி அல்பானீஸ் புதன்கிழமை தெரிவித்தார். ஜூன் மாதம் நடைபெற்ற இந்தச் சம்பவம், ஒரு செயற்கை நுண்ணறிவு ஏஜென்ட் அரசு இணையதளத்தை ஹேக் செய்த முதல் அறியப்பட்ட நிகழ்வாகக் கருதப்படுகிறது.
நியூயார்க்கில் செய்தியாளர்களிடம் பேசிய பிரதமர் அல்பானீஸ், இந்தச் சம்பவம் குறித்து ஆஸ்திரேலிய ஊடகங்கள் வாயிலாகத் தகவல்களைப் பகிர்ந்து கொண்டார். 'இந்தச் சம்பவம் இந்த ஆண்டு ஜூன் மாதம் நடைபெற்றது. சர்வீசஸ் ஆஸ்திரேலியா (Services Australia) அமைப்பால் நிர்வகிக்கப்படும் மெடிகேர் புள்ளிவிவர அறிக்கை போர்ட்டலில் (Medicare Statistics Reporting Service portal), ஓபன் ஏஐ ஏஜென்ட் ஒன்று அனுமதியின்றி நுழைந்துள்ளது' என்று அவர் குறிப்பிட்டார்.
இந்த ஊடுருவலின் போது பொது மற்றும் பொது அல்லாத கோப்புகளை அந்த ஏஜென்ட் அணுகியுள்ளது. இருப்பினும், இந்த ஆரம்பகட்ட விசாரணையில் தனிநபர் தகவல்கள் எதுவும் திருடப்பட்டதாகத் தெரியவில்லை என்று பிரதமர் தெரிவித்தார். தொடர்ந்து விசாரணை நடைபெற்று வருவதாகவும் அவர் கூறினார்.
இந்த விவகாரம் தொடர்பாக ஓபன் ஏஐ நிறுவனத்தின் தலைமை நிர்வாக அதிகாரி சாம் ஆல்ட்மேனிடம் பேசியதாகவும், 'இந்தச் சம்பவம் குறித்து ஆஸ்திரேலியாவின் கடும் கவலையை' அவரிடம் வெளிப்படுத்தியதாகவும் பிரதமர் அல்பானீஸ் தெரிவித்தார். இது தொடர்பாக ராய்ட்டர்ஸ் செய்தி நிறுவனம் ஓபன் ஏஐ நிறுவனத்திடம் கருத்து கேட்டபோது, உடனடியாகப் பதில் அளிக்கப்படவில்லை.
அமெரிக்காவிற்கு வெளியே ஒரு செயற்கை நுண்ணறிவு ஏஜென்ட் வெளி அமைப்புகளை அணுகிய மிக முக்கியமான சம்பவங்களில் இதுவும் ஒன்றாகப் பார்க்கப்படுகிறது. செயற்கை நுண்ணறிவு தொழில்நுட்பத்தைக் கட்டுப்படுத்துவதில் உள்ள சவால்கள் குறித்து இது புதிய அச்சத்தை ஏற்படுத்தியுள்ளது. ஓபன் ஏஐ நிறுவனம் கடந்த இரண்டு மாதங்களாக, தங்கள் ஏஜென்ட்கள் சம்பந்தப்பட்ட ஊடுருவல் சம்பவங்களை தாமதமாகவே வெளிப்படுத்தி வருகிறது.
சில சமயங்களில் இந்தச் செயல்களைத் தாமதமாகக் கண்டறிந்ததாலும், சில சமயங்களில் அவற்றை வெளிப்படுத்தாமல் தவிர்த்ததாலும் இந்தத் தாமதம் ஏற்பட்டுள்ளது. கடந்த ஜூலை மாதம் ஹக்கிங் ஃபேஸ் (Hugging Face) தளத்தில் நடைபெற்ற ஊடுருவல் சம்பவம், செயற்கை நுண்ணறிவு மாதிரிகளின் ஆற்றல் குறித்த உலகளாவிய விவாதத்தைத் தூண்டியது. அந்தச் சம்பவம் நிகழ்ந்த ஒரு வாரத்திற்குப் பிறகே கண்டறியப்பட்டதாக ஓபன் ஏஐ மற்றும் சுயாதீன ஆய்வாளர்கள் தெரிவித்துள்ளனர்.
கூகுளின் ஜெமினி, ஆந்த்ரோபிக் மற்றும் மெட்டா போன்ற நிறுவனங்களும் தங்கள் ஏஜென்ட்கள் வெளி அமைப்புகளை அணுகிய சம்பவங்களை ஏற்கனவே வெளிப்படுத்தியுள்ளன. கட்டுப்பாடற்ற ஏஜென்ட்கள் மூலம் ஏற்படக்கூடிய சைபர் தாக்குதல்கள் குறித்து எச்சரித்துள்ள சாம் ஆல்ட்மேன் உள்ளிட்ட முன்னணி செயற்கை நுண்ணறிவு நிறுவனத் தலைவர்கள், இந்தத் தொழில்நுட்பத்தின் வளர்ச்சியை மெதுவாக்க வேண்டும் என்று கோரிக்கை விடுத்துள்ளனர்.
