உத்தரப் பிரதேச மாநிலம் கிரேட்டர் நொய்டாவில் உள்ள யமுனா விரைவுச் சாலையில் புதன்கிழமை நள்ளிரவு சொகுசு பேருந்து ஒன்று தீப்பிடித்து எரிந்ததில், பெண் ஒருவர் உட்பட 9 பயணிகள் உயிரிழந்தனர். இந்த விபத்தில் பலர் காயமடைந்துள்ளனர். நொய்டாவிலிருந்து மஹோபா நோக்கிச் சென்றுகொண்டிருந்த அந்தப் பேருந்தில் சுமார் 35 பயணிகள் பயணம் செய்ததாகத் தகவல்கள் தெரிவிக்கின்றன.
பெரும்பாலான பயணிகள் தூங்கிக்கொண்டிருந்தபோது இந்த விபத்து நிகழ்ந்துள்ளது. பேருந்தின் ஏர் கண்டிஷனிங் (AC) அமைப்பில் ஏற்பட்ட வெடிப்பு காரணமாகவே தீ விபத்து ஏற்பட்டதாக முதற்கட்ட விசாரணையில் தெரியவந்துள்ளது. இந்த வெடிப்பு, எஞ்சினில் இருந்த லூப்ரிகேட்டிங் ஆயிலில் தீப்பற்றச் செய்ததால், பேருந்து முழுவதும் தீ மளமளவெனப் பரவியுள்ளது.
தீ விபத்தால் பேருந்துக்குள் பெரும் குழப்பம் நிலவியது. உயிர் பிழைக்கப் பல பயணிகள் ஜன்னல் வழியாகக் குதித்து வெளியேறினர். தகவல் அறிந்து சம்பவ இடத்திற்கு விரைந்த தீயணைப்புப் படையினரும், ஜேவார் காவல் நிலைய அதிகாரிகளும் மீட்புப் பணிகளில் ஈடுபட்டனர்.
இந்த விபத்து தொடர்பாக வழக்குப்பதிவு செய்துள்ள காவல்துறையினர், பேருந்தின் ஓட்டுநர் மற்றும் நடத்துநரைக் கைது செய்துள்ளனர். விபத்தில் உயிரிழந்தவர்களின் குடும்பங்களுக்குப் பிரதமர் நரேந்திர மோடி ஆழ்ந்த இரங்கலைத் தெரிவித்துள்ளார். பிரதமர் தேசிய நிவாரண நிதியிலிருந்து (PMNRF) உயிரிழந்தவர்களின் குடும்பங்களுக்கு தலா ரூ.
2 லட்சம் இழப்பீடும், காயமடைந்தவர்களுக்கு தலா ரூ. 50,000 நிதியுதவியும் வழங்கப்படும் என அறிவிக்கப்பட்டுள்ளது. இதேபோல், உத்தரப் பிரதேச முதல்வர் யோகி ஆதித்யநாத்தும் உயிரிழந்தவர்களின் குடும்பங்களுக்குத் தலா ரூ.
2 லட்சம் மற்றும் காயமடைந்தவர்களுக்கு தலா ரூ. 50,000 இழப்பீடு அறிவித்துள்ளார். மேலும், காயமடைந்தவர்களுக்குச் சிறந்த சிகிச்சை அளிப்பதை உறுதி செய்யுமாறு அதிகாரிகளுக்கு அவர் உத்தரவிட்டுள்ளார்.
விபத்தின்போது பேருந்தில் இருந்த பயணி ஒருவர் அந்தச் சூழலை விவரிக்கும்போது, "நான் தூங்கிக்கொண்டிருந்தபோது யாரோ கதவைத் தட்டும் சத்தம் கேட்டது. கண் விழித்துப் பார்த்தபோது, பேருந்து முழுவதும் புகை மண்டலமாக இருந்தது. எதையும் பார்க்க முடியவில்லை, மக்கள் மூச்சுத்திணறினர்.
நான் எனது உடைமைகளைக்கூட எடுக்கவில்லை, செல்போனை மட்டும் எடுத்துக்கொண்டு வெளியேறினேன். மக்கள் நெரிசலில் சிக்கித் தவித்தனர். தள்ளுமுள்ளு காரணமாக வெளியேறுவது மிகவும் கடினமாக இருந்தது.
எனக்குப் பின்னால் இருந்த பலர் வெளியே வர முடியாமல் சிக்கிக்கொண்டனர்" என்று கூறினார்.
