இந்திய தொழில்நுட்பக் கழகங்களில் (ஐஐடி) வளாக நேர்காணல் மூலம் மாணவர்களுக்கு வழங்கப்பட்ட வேலைவாய்ப்பு ஆணைகளை நிறைவேற்றாத 22 நிறுவனங்களுக்கு, அடுத்த இரண்டு கல்வி ஆண்டுகளுக்குத் தடை விதிக்க ஐஐடி நிர்வாகம் முடிவு செய்துள்ளது. 2026-ஆம் ஆண்டு பட்டதாரி மாணவர்களுக்கு வழங்கப்பட்ட 150-க்கும் மேற்பட்ட வேலைவாய்ப்புகளை இந்த நிறுவனங்கள் ரத்து செய்துள்ளன. இந்த விவகாரம் தொடர்பாக, சம்பந்தப்பட்ட நிறுவனங்களுக்கு செப்டம்பர் 30-ஆம் தேதிக்குள் முறையான அறிவிப்பு அனுப்பப்படும் என்று அனைத்து ஐஐடி-களின் வேலைவாய்ப்பு குழு (AIPC) தெரிவித்துள்ளது. இந்தத் தடையின் மூலம், அடுத்த இரண்டு ஆண்டுகளுக்கு இந்த நிறுவனங்கள் ஐஐடி வளாக நேர்காணல் நடைமுறைகளில் பங்கேற்க முடியாது.
இந்த நடவடிக்கை குறித்து கருத்து தெரிவித்த ஐஐடி-குவஹாத்தியின் இணைப் பேராசிரியரும், ஏஐபிசி ஒருங்கிணைப்பாளருமான ஜான் ஜோஸ், இதனை 'கறுப்புப் பட்டியலில் சேர்த்தல்' (Blacklisting) என்று அழைக்காமல், 'ஒத்துழைப்பு மறுப்பு' (Non-cooperation) என்று குறிப்பிட்டார். சில நிறுவனங்கள் தலா 10 முதல் 15 வேலைவாய்ப்புகளைத் திரும்பப் பெற்றுள்ளன. பாதிக்கப்பட்ட மாணவர்களின் எண்ணிக்கை மற்றும் நிறுவனங்களின் இறுதிப் பட்டியல் குறித்த தரவுகள் சேகரிக்கப்பட்டு வருகின்றன.
இந்தத் தடையை எதிர்கொள்ளும் நிறுவனங்களில் முன்னணி மென்பொருள் நிறுவனமான ஆரக்கிளும் (Oracle) அடங்கும். இந்நிறுவனம் சுமார் 40 மாணவர்களுக்கு வழங்கிய வேலைவாய்ப்பு ஆணைகளை நிறைவேற்றவில்லை என்று தகவல்கள் தெரிவிக்கின்றன. மேலும், பல ஸ்டார்ட்-அப் நிறுவனங்களும் இந்தப் பட்டியலில் உள்ளன. ஆரக்கிள் நிறுவனம் இந்த ஆண்டு ஐஐடி-களை அணுகவில்லை என்று ஜான் ஜோஸ் குறிப்பிட்டார். இது குறித்து கருத்து தெரிவிக்க ஆரக்கிள் நிறுவனம் மறுத்துவிட்டது. செயற்கை நுண்ணறிவு உள்கட்டமைப்புக்கான முதலீடுகளை அதிகரிக்கவும், பணிநீக்க நடவடிக்கைகளை மேற்கொள்ளவும் ஆரக்கிள் நிறுவனம் தனது நிதித் திட்டத்தில் மாற்றங்களைச் செய்து வருகிறது.
இந்தக் கடுமையான முடிவை எடுப்பதற்கு முன்னதாக, வேலைவாய்ப்புகளைத் திரும்பப் பெற்ற நிறுவனங்களுடன் ஐஐடி நிர்வாகம் பல மாதங்களாகப் பேச்சுவார்த்தை நடத்தியது. கடந்த ஜூன் மாதம், ஆரக்கிள், இன்டர்வியூ கிக்சார்ட் (Interview Kickstart), சூப்பர் ஏஜிஐ (SuperAGI) உள்ளிட்ட 10-க்கும் மேற்பட்ட நிறுவனங்களுக்கு ஏஐபிசி எச்சரிக்கை விடுத்திருந்தது. வேலைவாய்ப்புகளை உறுதி செய்ய வேண்டும் அல்லது பாதிக்கப்பட்ட மாணவர்களுக்கு மூன்று மாத ஊதியத்தை இழப்பீடாக வழங்க வேண்டும் என்று அறிவுறுத்தப்பட்டது. அப்போது சுமார் 100 மாணவர்கள் பாதிக்கப்பட்டிருந்தனர். ஆகஸ்ட் 15-க்குள் பதிலளிக்க காலக்கெடு விதிக்கப்பட்டிருந்தது. பின்னர், செப்டம்பர் 15-க்குள் மாணவர்களைப் பணியில் அமர்த்த வேண்டும் என்று இறுதி எச்சரிக்கை விடுக்கப்பட்டது. ஐஐடி-குவஹாத்தியில் நடைபெற்ற கூட்டத்திற்குப் பிறகு, இந்த இரண்டு ஆண்டு கால ஒத்துழைப்பு மறுப்பு நடவடிக்கையை எடுக்க ஏஐபிசி முடிவெடுத்தது.
கடந்த ஆண்டு சுமார் 10 முதல் 11 நிறுவனங்கள் வேலைவாய்ப்புகளை வழங்காமல் இருந்தன. ஆனால், இந்த ஆண்டு அந்த எண்ணிக்கை கணிசமாக உயர்ந்துள்ளது என்று ஜான் ஜோஸ் சுட்டிக்காட்டினார். இதற்கிடையில், பாதிக்கப்பட்ட மாணவர்களுக்கு மாற்று வேலைவாய்ப்புகளைப் பெற்றுத் தரும் முயற்சியில் ஐஐடி-களின் வேலைவாய்ப்பு அலுவலகங்கள் ஈடுபட்டுள்ளன. ஏற்கனவே உள்ள நிறுவனங்களிடம் இந்த மாணவர்களின் விவரங்கள் பகிரப்பட்டு, அவர்களுக்கு வேலைவாய்ப்பு வழங்கக் கோரப்பட்டுள்ளது. இதில் சுமார் 20 முதல் 30 சதவீத மாணவர்கள் ஏற்கனவே மாற்று வேலைகளைப் பெற்றுவிட்டதாக மதிப்பிடப்பட்டுள்ளது. ஐஐடி-களில் புதிய வேலைவாய்ப்பு சுழற்சி தொடங்க உள்ள நிலையில், இந்த நடவடிக்கை முக்கியத்துவம் பெறுகிறது.
