தாராபுரம் தொகுதி இடைத்தேர்தலில் திமுக வேட்பாளர் எஸ். சுகன்யாவை ஆதரித்து எதிர்க்கட்சித் தலைவர் உதயநிதி ஸ்டாலின் இன்று தீவிர வாக்கு சேகரிப்பில் ஈடுபட்டார். அப்போது அவர் பேசுகையில், தமிழக முதல்வர் விஜய் மற்றும் தவெக கட்சியின் செயல்பாடுகளைக் கடுமையாக விமர்சித்தார்.
மதுராந்தகம் தேர்தல் பிரச்சாரத்தில் முதல்வர் விஜய் 30 நிமிடங்களில் 32 முறை 'திமுக' என்று உச்சரித்ததைச் சுட்டிக்காட்டிய உதயநிதி, "அந்தளவுக்கு திமுக மீது முதல்வருக்கு பயம் உள்ளது. நாம் கூட திமுகவைப் பற்றி அவ்வளவு பேசியிருக்க மாட்டோம்" என்று குறிப்பிட்டார். தவெக ஆட்சி, திமுக ஆதரவுடன் வெற்றி பெற்ற கட்சிகளின் துணையோடு நடப்பதாகக் குற்றம் சாட்டிய அவர், சில கூட்டணிக் கட்சியினர் மு.
க. ஸ்டாலினிடம் தெரிவித்துவிட்டுச் சென்றதாகவும், சிலர் முதுகில் குத்திவிட்டுச் சென்றதாகவும் தெரிவித்தார். மேலும், முதல்வர் விஜய் அனைத்துக் கட்சித் தலைவர்களின் வீடுகளுக்கும் சென்று சோஃபாக்களை வழங்கியதையும், சட்டமன்ற உறுப்பினர்களுக்குப் 'பெட்டி' கொடுத்து வளைத்ததையும் அவர் விமர்சித்தார்.
தவெக ஆட்சி அமைந்த பிறகு, திமுக எம்எல்ஏக்கள் மீது வழக்குகள் பதியப்படுவதாகவும், அதிமுக எம்எல்ஏக்களுக்குப் பெட்டி கொடுக்கப்படுவதாகவும் அவர் கூறினார். குறிப்பாக, அதிமுகவின் 7 எம்எல்ஏக்கள் பதவியேற்ற 10 நாட்களில் ராஜினாமா செய்துவிட்டு, குதிரை பேரம் மூலம் கட்சி மாறியுள்ளதைச் சுட்டிக்காட்டினார். "சட்டமன்றத்தில் சபாநாயகர் ஆக்ஷன் சொன்னால் விஜய் நடிக்க ஆரம்பித்து விடுகிறார்.
நீங்கள் மறுபடியும் தவெக வேட்பாளரை ஜெயிக்க வைத்தீர்கள் என்றால், சட்டப்பேரவைக்குச் சென்று முதல்வரைப் புகழ்ந்து பாட்டுதான் பாடுவார், இல்லையெனில் ரீல்ஸ் போடுவார்கள். அதிமுக வேட்பாளருக்கு ஓட்டுப் போட்டீர்கள் என்றால், மீண்டும் பெட்டி வாங்கிக் கொண்டு கட்சி மாறிவிடுவார்கள்" என்று அவர் எச்சரித்தார். தவெக அளித்த வாக்குறுதிகள் எதையும் நிறைவேற்றவில்லை என்று கூறிய உதயநிதி, தற்போதைய சூழலில் மின்வெட்டு மற்றும் அரிவாள் வெட்டு ஆகிய இரண்டுக்கும் இடையேதான் போட்டி நிலவுவதாகக் குறிப்பிட்டார்.
தாராபுரம் தொகுதி திமுக வேட்பாளர் எஸ். சுகன்யா நன்கு படித்தவர் என்றும், சட்டமன்றத்தில் மக்களின் குரலாக ஒலிப்பார் என்றும் கூறிய உதயநிதி, அவரை உதயசூரியன் சின்னத்தில் வெற்றி பெறச் செய்யுமாறு வாக்காளர்களைக் கேட்டுக்கொண்டார்.
