தட்டில் இருக்கும் உணவு பாதுகாப்பானதா? – தொடரும் உணவுப் பொருள் சர்ச்சைகள் எழுப்பும் கேள்விகள்
நாம் தினமும் நம்பிக்கையுடன் வாங்கி சமையலறையில் பயன்படுத்தும் பொருட்களே அடுத்தடுத்து உணவுப் பாதுகாப்பு அமைப்புகளின் நடவடிக்கைக்கு உள்ளாகும்போது, ஒரு சாதாரண நுகர்வோருக்கு எழும் மிக முக்கியமான கேள்வி இதுதான்:
“நாம் வாங்கும் உணவு உண்மையில் பாதுகாப்பானதா?”
கடந்த ஆகஸ்ட் மாதம் FSSAI நடத்திய ஆய்வில் Everest மற்றும் LG நிறுவனங்களின் சில Compounded Hing (பெருங்காயம்) தயாரிப்புகள் நிர்ணயிக்கப்பட்ட தரத்தைப் பூர்த்தி செய்யவில்லை எனக் கண்டறியப்பட்டது. இதையடுத்து அவற்றின் விற்பனைக்கு தடை உத்தரவு பிறப்பிக்கப்பட்டதுடன், தரமற்ற பொருட்களை சந்தையிலிருந்து திரும்பப் பெறவும் நிறுவனங்களுக்கு அறிவுறுத்தப்பட்டது. குறிப்பாக LG நிறுவனத்திடமிருந்து பரிசோதிக்கப்பட்ட ஆறு வகை raw hing மாதிரிகளில் அனுமதிக்கப்பட்ட 1% அளவை விட மிக அதிகமாக 15% முதல் 32% வரை starch இருந்ததாக மத்திய அரசின் அதிகாரப்பூர்வ செய்திக்குறிப்பு தெரிவித்தது.
ஆனால் இங்கு இன்னொரு முக்கியமான கேள்வி எழுகிறது.
இந்த நடவடிக்கை எத்தனை நுகர்வோருக்குத் தெரியும்?
ஏற்கெனவே வாங்கி வீட்டின் சமையலறையில் வைத்திருக்கும் பெருங்காயத்தைப் பற்றி எத்தனை குடும்பங்களுக்கு தகவல் சென்றடைந்துள்ளது? ஒரு பொருளுக்கு விற்பனைத் தடை அல்லது recall அறிவிக்கப்பட்ட பிறகும், அதைப் பற்றிய தகவல் அந்தப் பொருளை வாங்கிய கடைசி நுகர்வோர் வரை சென்றடையாவிட்டால் அந்த நடவடிக்கையின் முழுப் பயன் கிடைக்குமா?
பெருங்காயத்தைத் தொடர்ந்து பால் பொருள்
அக்டோபர் 3 அன்று Nestlé நிறுவனத்தின் Low Fat Dairy Whitener மாதிரி ஒன்று ஆய்வகப் பரிசோதனையில் “unsafe and substandard” என வகைப்படுத்தப்பட்டதாக தகவல் வெளியானது. அந்த மாதிரி டெல்லியில் உள்ள ஒரு ஹோட்டலில் இருந்து எடுக்கப்பட்டதாகவும், சம்பந்தப்பட்ட பொருளின் விற்பனையை நிறுத்த நடவடிக்கை எடுக்கப்பட்டதாகவும் தெரிவிக்கப்பட்டுள்ளது.
இதற்கு சில வாரங்களுக்கு முன்பே Nestlé நிறுவனத்தின் infant nutrition தயாரிப்பு தொடர்பாகவும் FSSAI சட்ட நடவடிக்கையைத் தொடங்கியிருந்தது. ஒரு follow-up formula மாதிரியில் biotin அளவு இந்திய தரநிலைகளுக்கு ஏற்ப இல்லை என்று மறுபரிசோதனையிலும் கண்டறியப்பட்டதாக தெரிவிக்கப்பட்டது.
இப்போது Everest சீரகப் பொடி
இன்று மற்றொரு அதிர்ச்சி தகவல் வெளியாகியுள்ளது.
Everest நிறுவனத்தின் pre-packed cumin powder (சீரகப் பொடி) குறிப்பிட்ட batch ஒன்றை திரும்பப் பெற FSSAI உத்தரவிட்டுள்ளது.
கோவாவில் உள்ள Riverside Resorts & Holiday Homes வளாகத்தில் இருந்து எடுக்கப்பட்ட மாதிரியை ஆய்வு செய்தபோது, Azoxystrobin மற்றும் Thiamethoxam என்ற பூச்சிக்கொல்லி எச்சங்கள் அனுமதிக்கப்பட்ட அதிகபட்ச அளவை விட அதிகமாக இருந்ததாக Food Analyst அறிக்கை தெரிவித்துள்ளது. இதனால் அந்த மாதிரி “unsafe” என அறிவிக்கப்பட்டு, சம்பந்தப்பட்ட batch-ஐ recall செய்ய நடவடிக்கை எடுக்கப்பட்டுள்ளது.
இங்கு ஒரு விஷயத்தைத் தெளிவாகப் புரிந்துகொள்ள வேண்டும்:
Everest நிறுவனத்தின் அனைத்து சீரகப் பொடிகளும் தடை செய்யப்பட்டுள்ளன என்று இதற்கு அர்த்தமல்ல. நடவடிக்கை குறிப்பிட்ட batch தொடர்பானது.
ஆனால் தொடர்ந்து பெரிய நிறுவனங்களின் அன்றாட உணவுப் பொருட்களில் தரக்குறைவு அல்லது பாதுகாப்பு விதிமீறல்கள் கண்டறியப்படுவது, உணவுப் பாதுகாப்பு கண்காணிப்பு குறித்த பெரிய விவாதத்தை உருவாக்குகிறது.
தடை விதிப்பது மட்டும் போதுமா?
ஒரு ஆய்வகத்தில் பிரச்சினை கண்டுபிடிக்கப்பட்டு, அதன் பின்னர் தடை அல்லது recall உத்தரவு வெளியிடப்படுகிறது.
ஆனால் அந்த நேரத்திற்குள் அந்தப் பொருள் எத்தனை கடைகளுக்குச் சென்றது?
எத்தனை வீடுகளுக்குச் சென்றது?
எத்தனை பேர் அதைப் பயன்படுத்திவிட்டார்கள்?
ஏற்கெனவே வாங்கிய நுகர்வோர் தங்களிடம் உள்ள packet பாதிக்கப்பட்ட batch-ஐ சேர்ந்ததா என்பதை எப்படித் தெரிந்துகொள்வது?
இதுதான் தற்போது முக்கியமான கேள்வி.
உணவுப் பாதுகாப்பு என்பது தவறு கண்டுபிடிக்கப்பட்ட பிறகு நடவடிக்கை எடுப்பது மட்டும் அல்ல; அந்தத் தகவலை நுகர்வோரிடம் வேகமாக கொண்டு சேர்ப்பதும் அதன் ஒரு பகுதியாக இருக்க வேண்டும்.
Recall அறிவிக்கப்பட்டால் அதன் brand, product, batch/lot number, manufacturing date, expiry date போன்ற விவரங்கள் பொதுமக்களுக்கு மிக எளிதாகக் கிடைக்க வேண்டும். கடைகளிலும் அந்தத் தகவல் தெளிவாகக் காட்டப்பட வேண்டும்.
மேலும் ஏற்கெனவே பொருளை வாங்கியவர்கள் அதை பயன்படுத்தாமல் இருக்க வேண்டுமா, திருப்பிக் கொடுக்க வேண்டுமா, மாற்றுப் பொருள் பெற முடியுமா போன்ற வழிகாட்டுதலும் நுகர்வோருக்கு நேரடியாகச் சென்றடைய வேண்டும்.
“பெரிய பிராண்ட்” என்ற நம்பிக்கை மட்டும் போதுமா?
பல குடும்பங்களில் பொருள் வாங்கும்போது அதன் ingredient list, batch number அல்லது regulatory alerts பார்க்கப்படுவதில்லை.
“பல வருடங்களாக வாங்கும் பிராண்ட்” என்ற நம்பிக்கையே முக்கியமான அளவுகோலாக இருக்கிறது.
ஆனால் சமீபத்திய சம்பவங்கள் ஒரு பாடத்தைச் சொல்கின்றன:
பிராண்டின் பெயர் பெரியதாக இருக்கலாம். விளம்பரம் பிரம்மாண்டமாக இருக்கலாம். ஆனால் நுகர்வோரின் தட்டிற்கு வரும் ஒவ்வொரு உணவுப் பொருளுக்கும் தொடர்ச்சியான தரப் பரிசோதனையும் கண்காணிப்பும் அவசியம்.
ஒரு மருந்து recall செய்யப்பட்டால் மக்கள் அதைப் பற்றி தீவிரமாக கவலைப்படுகிறார்கள். ஆனால் தினமும் உடலுக்குள் செல்லும் உணவுப் பொருளின் recall-க்கும் அதே அளவு விழிப்புணர்வு தேவை.
பெருங்காயம் முதல் பால் பொருள் வரை, இப்போது சீரகப் பொடி வரை தொடரும் சம்பவங்கள் ஒரு எச்சரிக்கை மணி.
உணவுப் பாதுகாப்பு என்பது அரசின் பொறுப்பு மட்டும் அல்ல; நிறுவனங்களின் பொறுப்பும் கூட. அதே நேரத்தில், எந்தப் பொருளுக்கு நடவடிக்கை எடுக்கப்பட்டது, எந்த batch பாதிக்கப்பட்டது என்ற தகவலை அறிந்துகொள்வது நுகர்வோரின் உரிமை.
“தடை விதிக்கப்பட்டதா?” என்பதை விட, “அந்தத் தகவல் ஒவ்வொரு சமையலறைக்கும் சென்றடைந்ததா?” என்பதே இன்று கேட்க வேண்டிய பெரிய கேள்வி.
