ஆசிய வளர்ச்சி வங்கியின் நிதியுதவியுடன் சென்னையில் செயல்படுத்தப்பட்டு வரும் ஒருங்கிணைந்த மழைநீர் வடிகால் திட்டத்தின் பணிகள் 99.89 சதவீதம் நிறைவடைந்துள்ளதாக பெருநகர சென்னை மாநகராட்சி தெரிவித்துள்ளது. வடகிழக்கு பருவமழை முன்னெச்சரிக்கை நடவடிக்கைகள் குறித்த ஆய்வுக் கூட்டத்தில், மேயர் ஆர். பிரியா முன்னிலையில் இது தொடர்பான விவரங்கள் சமர்ப்பிக்கப்பட்டன. திருவொற்றியூர், மணலி, மாதவரம், திரு.வி.க. நகர், அம்பத்தூர் மற்றும் அண்ணா நகர் ஆகிய ஆறு மண்டலங்களில் மேற்கொள்ளப்பட்டு வரும் இப்பணிகளின் முன்னேற்றம் குறித்து கூட்டத்தில் விவாதிக்கப்பட்டது.
மொத்தம் ரூ. 3,094.85 கோடி மதிப்பீட்டில், 652.11 கிலோமீட்டர் நீளத்திற்கு இந்த வடிகால் கட்டமைப்பு பணிகள் நடைபெறுகின்றன. அக்டோபர் 5, 2026 நிலவரப்படி, 651.42 கிலோமீட்டர் நீளத்திற்கு பணிகள் முடிக்கப்பட்டுள்ளன. இதற்காக இதுவரை ரூ. 2,907.93 கோடி செலவிடப்பட்டுள்ளது, இது மொத்த நிதி ஒதுக்கீட்டில் 94.01 சதவீதமாகும். மண்டலங்கள் 1, 2, 3 மற்றும் 8 ஆகியவற்றில் பணிகள் முழுமையாக நிறைவடைந்துள்ளன.
மண்டலம் 6 மற்றும் 7-ல் மட்டும் மிகச்சிறிய அளவிலான பணிகள் எஞ்சியுள்ளன. இந்த மண்டலங்களில் 99.67 சதவீத பணிகள் முடிந்துள்ள நிலையில், மீதமுள்ள 0.69 கிலோமீட்டர் நீளத்திற்கான பணிகள் அக்டோபர் 15, 2026-க்குள் முடிக்கப்படும் என எதிர்பார்க்கப்படுகிறது.
