பிரான்சில் கடந்த சில நாட்களாக நடைபெற்று வரும் வன்முறை மற்றும் கலவரங்களைக் கட்டுப்படுத்த, அந்தந்த நகரங்களின் மேயர்கள் பகுதிநேர ஊரடங்கை அமல்படுத்திக்கொள்ள பிரெஞ்சு அரசு அனுமதி அளித்துள்ளது. இது குறித்துப் பேசிய பிரதமர் செபாஸ்டியன் லெகோர்னு, "கொள்ளையர்கள், வன்முறையாளர்கள் மற்றும் சமூக விரோதிகளின் கட்டளைக்கு நாங்கள் அடிபணிய மாட்டோம்" என்று திட்டவட்டமாகத் தெரிவித்தார்.
பிரான்சில் நடைபெற்று வரும் இந்த வன்முறைகள், 2027-ம் ஆண்டு நடைபெறவுள்ள அதிபர் தேர்தலை முன்னிட்டு நாட்டில் குழப்பத்தை ஏற்படுத்தத் துடிக்கும் சில தீவிர இடதுசாரி தீவிரவாதக் குழுக்களால் தூண்டப்படுவதாக அவர் குற்றம் சாட்டியுள்ளார். வடக்கு பிரான்சில் உள்ள லீல், டூயே, வாட்னிக்ஸ் மற்றும் டெனைன் ஆகிய நகரங்களில் மாலை 6 மணி முதல் அதிகாலை 4 மணி வரை ஊரடங்கு அமல்படுத்தப்படவுள்ளது.
அதேபோல், மார்செய் நகரில் பொது இடங்களில் மக்கள் கூடுவதைத் தடுக்கும் வகையில் அவசரக்காலத் தடை உத்தரவு பிறப்பிக்கப்பட்டுள்ளது. கோலைன் நகரில், 18 வயதுக்குட்பட்ட இளைஞர்கள் இரவு 11 மணிக்கு மேல் வெளியே வரக்கூடாது என்று அந்த நகர மேயர் கிறிஸ்டோப் ரூலியன் உத்தரவிட்டுள்ளார். இந்த வன்முறைகளால் நாடு முழுவதும் சுமார் 2,000 வணிக நிறுவனங்கள் நேரடியாகப் பாதிக்கப்பட்டுள்ளன.
குறிப்பாக, மார்செய் நகரில் மட்டும் 600-க்கும் மேற்பட்ட கடைகள் கொள்ளையடிக்கப்பட்டுள்ளதாக வர்த்தக அமைப்புகள் தெரிவிக்கின்றன. கொள்ளையடிக்கப்பட்ட பொருட்கள் விண்டெட் (Vinted) போன்ற இணையதளங்களில் விற்பனைக்கு வைக்கப்படுவதாகக் குற்றச்சாட்டுகள் எழுந்தன. இதைத் தொடர்ந்து, அத்தகைய பதிவுகளை உடனடியாக நீக்கி வருவதாகவும், விதிமீறலில் ஈடுபடும் கணக்குகள் நிரந்தரமாக முடக்கப்படும் என்றும் விண்டெட் நிறுவனம் தெரிவித்துள்ளது.
வன்முறைகளைத் தூண்டுவதாக பிரதமர் லெகோர்னு முன்வைத்துள்ள குற்றச்சாட்டுக்கு, இடதுசாரித் தலைவர் ஜீன்-லூக் மெலன்சோன் கடும் எதிர்ப்பு தெரிவித்துள்ளார். பிரதமர் தனது குற்றச்சாட்டை நிரூபிக்க வேண்டும் என்றும், இல்லையெனில் அவர் மன்னிப்பு கேட்டுக்கொண்டு அமைதியாக இருக்க வேண்டும் என்றும் மெலன்சோன் வலியுறுத்தியுள்ளார். பிரான்சில் தற்போது நிலவும் சூழல் குறித்து ஆய்வு செய்யும் 'ஆக்லெட்' (Acled) அமைப்பு, கடந்த ஐந்து ஆண்டுகளில் இல்லாத அளவுக்கு வன்முறைகள் அதிகரித்துள்ளதாகத் தெரிவித்துள்ளது.
கடந்த சனிக்கிழமை மட்டும் நாடு முழுவதும் 5 லட்சத்திற்கும் அதிகமானோர் போராட்டத்தில் ஈடுபட்டனர். ஞாயிற்றுக்கிழமை பாரிஸில் மட்டும் 350-க்கும் மேற்பட்டோர் கைது செய்யப்பட்டுள்ளனர். இந்த வன்முறைச் சூழலைக் கருத்தில் கொண்டு, பிரான்சுக்குச் செல்லும் தங்கள் நாட்டுப் பயணிகளுக்குப் பாதுகாப்பு எச்சரிக்கைகளை சீனா மற்றும் ஜெர்மனி ஆகிய நாடுகள் விடுத்துள்ளன.
