கடந்த ஆகஸ்ட் 27-28 தேதிகளில் 'அர்னாப்' புயல் கரையை கடந்தபோது, ஆந்திரா மற்றும் ஒடிசா மாநிலங்களில் சுமார் 1,80,000-க்கும் மேற்பட்ட மக்கள் பாதுகாப்பாக வெளியேற்றப்பட்டனர். இஸ்ரோ செயற்கைக்கோள்கள் புயலின் நகர்வுகளைத் தொடர்ந்து கண்காணித்த நிலையில், இந்திய வானிலை ஆய்வு மையம் (IMD) உரிய எச்சரிக்கைகளை விடுத்தது. தேசிய மற்றும் மாநில பேரிடர் மீட்புப் படையினர் தயார் நிலையில் வைக்கப்பட்டிருந்தனர்.
கடந்த பத்து ஆண்டுகளில், புயல் பாதிப்புகளைக் குறைக்க அதிநவீன எச்சரிக்கை அமைப்புகள், வானிலை ரேடார்கள், புயல் பாதுகாப்பு மையங்கள் மற்றும் பேரிடர் மீட்புக் குழுக்களை இந்தியா வலுப்படுத்தியுள்ளது. இருப்பினும், 'அர்னாப்' புயல் கரையை கடந்த ஒரு வாரத்திற்குள்ளேயே, மீண்டும் ஒரு புயல் ஆந்திர கடற்கரையை நோக்கி நகர்வது, இப்பகுதியின் பேரிடர் மேலாண்மைத் திறனுக்கு பெரும் சவாலாக மாறியுள்ளது.
ஆந்திரா, ஒடிசா மற்றும் தமிழ்நாடு ஆகிய மாநிலங்களின் தாழ்வான பகுதிகளில் வசிக்கும் லட்சக்கணக்கான மக்கள், பலத்த காற்று மற்றும் கடல் சீற்றத்தால் பாதிக்கப்படும் அபாயத்தில் உள்ளனர். புயலைக் கண்டறிவதில் முன்னேற்றம் ஏற்பட்டிருந்தாலும், எச்சரிக்கைகள் கடைக்கோடி மக்களையும் சென்றடைவதை உறுதி செய்வதும், அடுத்தடுத்த புயல்களுக்கு இடையே அத்தியாவசிய சேவைகளை விரைவாக மீட்டெடுப்பதுமே தற்போதைய முக்கிய சவாலாக உள்ளது.
இந்திய வானிலை ஆய்வு மையம், சென்னை, கொல்கத்தா, மசூலிப்பட்டினம், விசாகப்பட்டினம், பாரதீப், கோபால்பூர், ஸ்ரீஹரிகோட்டா மற்றும் காரைக்கால் ஆகிய இடங்களில் உள்ள டாப்ளர் வானிலை ரேடார்களைப் பயன்படுத்தி புயலின் தீவிரம் மற்றும் நகர்வுகளைக் கண்காணித்து வருகிறது. இருப்பினும், கடலோர மற்றும் மலைப்பாங்கான பகுதிகளில் இன்னும் சில ரேடார் இடைவெளிகள் இருப்பதை அரசு ஒப்புக்கொண்டுள்ளது.
ஆந்திர அரசு, புயல் பாதிப்பு குறித்த தகவல்களை ஒருங்கிணைக்க 'புயல் தகவல் மேலாண்மை அமைப்பு' (Cyclone Information Management System) என்ற பிரத்யேக தளத்தை உருவாக்கியுள்ளது. இதன் மூலம் பாதிப்புக்குள்ளாகும் பகுதிகள், மக்கள் தொகை, மருத்துவமனைகள் மற்றும் பள்ளிகளின் விவரங்கள் கண்காணிக்கப்படுகின்றன. 'அர்னாப்' புயலின் போது, ஆந்திராவில் 20 மாவட்டங்களில் 2,000-க்கும் மேற்பட்ட பாதுகாப்பு மையங்கள் திறக்கப்பட்டு, ஆயிரக்கணக்கான மக்கள் வெளியேற்றப்பட்டனர்.
அதேபோல், ஒடிசாவில் 'முன்கூட்டிய எச்சரிக்கை பரப்புதல் அமைப்பு' (Early Warning Dissemination System) மூலம் 22 தொகுதிகளில் உள்ள 1,205 கிராமங்களுக்கு நேரடியாக எச்சரிக்கைகள் அனுப்பப்படுகின்றன. தமிழகத்தைப் பொறுத்தவரை, புயல் பாதிப்புகளுடன் சேர்த்து, சென்னை போன்ற நகரங்களில் பெய்யும் கனமழையால் ஏற்படும் வெள்ளம் மற்றும் நீர் தேக்கத்தை எதிர்கொள்வது முக்கிய சவாலாக உள்ளது.
இதற்காக பெருநகர சென்னை மாநகராட்சி மழைநீர் வடிகால் கட்டமைப்புகளை மேம்படுத்தி வருகிறது. தேசிய புயல் இடர் தணிப்புத் திட்டத்தின் (NCRMP) கீழ், முதல் கட்டமாக ரூ. 2,525 கோடியும், இரண்டாம் கட்டமாக ரூ.
1,807 கோடியும் செலவிடப்பட்டு, புயல் பாதுகாப்பு மையங்கள் மற்றும் உள்கட்டமைப்புகள் வலுப்படுத்தப்பட்டுள்ளன. காலநிலை மாற்றத்தால் கடலின் வெப்பநிலை அதிகரித்து வருவதால், புயல்கள் அதிக தீவிரமடையும் அபாயம் உள்ளது. எனவே, புயலைக் கணிப்பது மற்றும் மக்களை வெளியேற்றுவதுடன் நின்றுவிடாமல், அடுத்தடுத்த புயல்களுக்கு இடையே உள்கட்டமைப்புகளை விரைவாகச் சீரமைத்து, இயல்பு நிலையைத் திரும்பக் கொண்டு வருவதே இந்தியாவின் கிழக்கு கடற்கரை மாநிலங்களுக்கு முன்னால் உள்ள உண்மையான சோதனையாகும்.
