ராஜஸ்தான் மாநிலம் டோங்க் மாவட்டத்தில் உள்ள சில கிராமங்களில், சமீபத்தில் நடந்த பஞ்சாயத்து சமிதி தேர்தலில் பாஜக வேட்பாளர் பிரியங்கா சர்மா தோல்வியடைந்ததைத் தொடர்ந்து, அங்கு பொருத்தப்பட்டிருந்த தெருவிளக்குகள் அகற்றப்பட்டுள்ளன. பீப்லு பஞ்சாயத்து சமிதியின் 4-வது வார்டு பகுதியில் இந்த நடவடிக்கை எடுக்கப்பட்டுள்ளது. இந்த விளக்குகள், எம்.எல்.ஏ. ராம் சகாய் வர்மாவின் தனி உதவியாளராகப் பணியாற்றும் அலோக் சர்மா என்பவரால் பொருத்தப்பட்டிருந்ததால், இது அரசியல் பழிவாங்கும் நடவடிக்கை என அப்பகுதி மக்கள் குற்றம் சாட்டியுள்ளனர்.
மின்சாரக் கம்பங்களில் உரிய அனுமதியின்றி இந்த விளக்குகள் இணைக்கப்பட்டிருந்ததே அகற்றுவதற்கு காரணம் என ஜெய்ப்பூர் வித்யுத் வித்ரன் நிகம் லிமிடெட் (JVVNL) அதிகாரிகள் விளக்கம் அளித்துள்ளனர். குமாரோன் கி தானி பகுதியில் 10 மின் கம்பங்களில் விளக்குகள் அகற்றப்பட்ட நிலையில், மீதமுள்ள 40 கம்பங்களில் விளக்குகளை அகற்றும் பணி நிறுத்தப்பட்டது. மின்சாரக் கட்டணத்தை தாங்களே ஏற்றுக்கொள்வதாக புதிதாகத் தேர்ந்தெடுக்கப்பட்ட கிராம சர்பஞ்சுகள் உறுதியளித்ததை அடுத்து இந்த முடிவு எடுக்கப்பட்டது.
இதற்கிடையில், இந்த விவகாரத்தில் அரசியல் உள்நோக்கம் ஏதுமில்லை என எம்.எல்.ஏ. ராம் சகாய் வர்மா மறுத்துள்ளார். தீபாவளி பண்டிகையை முன்னிட்டு விளக்குகள் பொருத்தப்பட்டதாகவும், மின் கட்டணப் பிரச்சினை காரணமாகவே அவை அகற்றப்பட்டதாகவும் அவர் கூறினார். இந்த விளக்குகள் எவ்வாறு பொருத்தப்பட்டன மற்றும் அனுமதியற்ற மின் இணைப்புகள் குறித்து விசாரணை நடத்த JVVNL உத்தரவிட்டுள்ளது.



