சவுதி அரேபியாவின் அல்-ஷைக் மின் நிலையம் மற்றும் ஜிசான் துறைமுகத்தை குறிவைத்து ஹவுதி கிளர்ச்சிப் படைகள் ஏவுகணை மற்றும் ட்ரோன் தாக்குதல்களை நடத்தியுள்ளன. இந்தத் தாக்குதல்களால் சவுதியின் சில பகுதிகளில் மின்சாரத் தடை ஏற்பட்டதுடன், முக்கியக் கட்டமைப்புகளும் சேதமடைந்துள்ளன. சவுதி ராணுவம் இரண்டு பாலிஸ்டிக் ஏவுகணைகளை இடைமறித்து அழித்ததாகக் கூட்டுப் படைகளின் செய்தித் தொடர்பாளர் துர்கி அல்-மாலிக்கி தெரிவித்துள்ளார்.
ஏமனின் மின் உற்பத்தி நிலையங்கள் மீது சவுதி நடத்திய தாக்குதல்களுக்குப் பதிலடியாகவே இந்த நடவடிக்கை எடுக்கப்பட்டதாக ஹவுதி செய்தித் தொடர்பாளர் யாஹ்யா சாரி விளக்கம் அளித்துள்ளார். சவுதி தொடர்ந்து தாக்குதல் நடத்தினால், அந்நாட்டின் மின் நிலையங்கள் மற்றும் துறைமுகங்கள் மீது நேரடித் தாக்குதல்கள் தொடரும் என அவர் எச்சரித்துள்ளார். நவம்பர் 20 மற்றும் 21 ஆகிய தேதிகளில் 24 மணி நேரத்திற்குள் சவுதியில் எட்டு முறை அவசர எச்சரிக்கைகள் விடுக்கப்பட்டுள்ளன.
தலைநகர் ரியாத்தை நோக்கி வந்த மூன்று பாலிஸ்டிக் ஏவுகணைகள் மற்றும் தெற்கு சவுதியை நோக்கி வந்த ட்ரோன் ஒன்றை சவுதி கூட்டுப் படைகள் அழித்துள்ளன. மத்திய கிழக்கில் நிலவும் போர் பதற்றங்களுக்கு மத்தியில், சவுதி மீதான இந்தத் தொடர் தாக்குதல்கள் அந்நாட்டின் பாதுகாப்பு அமைப்புகளுக்குப் புதிய சவாலாக மாறியுள்ளன. ஈரான் ஆதரவு பெற்ற ஹவுதிகளின் இந்தச் செயல் அமெரிக்காவுக்கும் கூடுதல் நெருக்கடியை ஏற்படுத்தியுள்ளது.




