மகளிர் டி20 உலகக்கோப்பை: நெதர்லாந்தை 96 ரன்கள் வித்தியாசத்தில் வீழ்த்தியது இந்தியா

10ஆவது மகளிர் டி20 உலகக்கோப்பை தொடர் இங்கிலாந்தின் பர்மிங்ஹாமில் ஜூன் 12ஆம் தேதி தொடங்கியது. 12 அணிகள் பங்கேற்கும் இத்தொடர் இரண்டு பிரிவுகளாகப் பிரிக்கப்பட்டுள்ளது. குரூப் ஏ-வில் இந்தியா, பாகிஸ்தான், ஆஸ்திரேலியா, தென் ஆப்பிரிக்கா, வங்கதேசம், நெதர்லாந்து ஆகிய அணிகளும், குரூப் பி-வில் வெஸ்ட் இண்டீஸ், இங்கிலாந்து, நியூசிலாந்து, இலங்கை, அயர்லாந்து, ஸ்காட்லாந்து ஆகிய அணிகளும் இடம்பெற்றுள்ளன. இந்திய அணி தனது இரண்டாவது போட்டியிலும் வெற்றிபெற்றுள்ளது. முன்னதாக, பாகிஸ்தானை வீழ்த்தியிருந்தது. இந்தியா மற்றும் நெதர்லாந்து அணிகள் மோதிய இன்றைய போட்டியில், முதலில் பேட் செய்த இந்திய அணி 20 ஓவர்களில் 5 விக்கெட் இழப்புக்கு 209 ரன்கள் குவித்தது. ஸ்மிருதி மந்தனா 74 ரன்களும், ஷபாலி வர்மா 56 ரன்களும் எடுத்து இந்திய அணிக்கு வலு சேர்த்தனர். 210 ரன்கள் எடுத்தால் வெற்றி என்ற இலக்குடன் களமிறங்கிய நெதர்லாந்து அணி, 17.3 ஓவர்களில் 114 ரன்களுக்கு அனைத்து விக்கெட்டுகளையும் இழந்தது. இதன் மூலம் இந்திய அணி 96 ரன்கள் வித்தியாசத்தில் அபார வெற்றி பெற்றது.